سناك سوري-حظ ونحس وأبراج
الحمل
الحمل يقف على الأطلال كثيراً هذه الأيام، طب ليش؟، انو من كل عقلك مصدق إنها مشتاقتلك؟، لك عيني ليكها العين تطرئها عايشة حياتها بلاك وبلا حبك ياولد، أحسنلك تقوم تجيب سطل النوتيلا لترفع مزاجيتك شوي، وإذا ماكان معك حقو روح بارك لجارتكن الولدانة وخدلك كمشة شوكولا، وركز على شغلك أكتر حاول لاقيلك شغل بعد الضهر بلك بتلاقي بنت حلال جديدة تقبل فيك عالحديدة.
الثور
صديقي الثور لا تكون تور، مين عمتعاند مثلاً ابن حارتك؟، هذا مديرك ياراجول، بيقول المثل الايد الي مافيك تعضها بوسها وادعيلا بالكسر، راس السنة قرب وفي ترفيعة لا تخسرها بعندك وتيسنتك، وأما على الصعيد العاطفي فما تخاف بتحبك وبتموت فيك بس خدلا شي هدية فرفح قلبها حاج متحملة عندك كلو.
الجوزاء
الفروج رخيص واليوم الجمعة قوم خدلك فروجين وطلع هالولاد مع أمهن مشوار عالطبيعة، حاج مقضاها نوم وسق ونق، يازلمة الحكومة والمعارضة رح يتصالحوا وYنت مو عرفان تتفق مع مرتك.
السرطان
ضلي ضحكيلو ياصبية، بس ماتفتحي تمك متر، هي ابتسامة ناعمة وتسبيلة عيون خفيفة ورح يجيكي راكع يطلب ودك، شوية حركات بنات من عندك وكلو بيمشي متل مابدك وأحسن.
الأسد
عندك رانديفو مهم اليوم، دير بالك من شي قذيفة طائشة فلكي سناك بينصحك بالأماكن المغلقة، بس هذا لا يعني تقلها امشي عالبيت، عيب عليك بتنفهم غلط بعدين، اخترلك شي مطعم بعيد عن المناطق الساخنة القريبة من الحرب.
العذراء
يا أرض اشتدي ماعليك حدا قدي، بمين شادد ضهرك اليوم؟، مدعوم ومرتاح وحاطت رجليك بمي باردة، بس ياحباب في حدا عم يحفرلك من تحت لتحت، قوم فذ شوف شو القصة أحسن ماتخسر كل شي دفعة وحدة.
الميزان
الحلم ماعليه جمرك، أصلا الجمارك مشغولة بشي تاني أهم من حلمك كلو عبعضو، إسرح بخيالك وطير بس لا تعلي كتير، حاول من ساعة للتانية ارجع عالواقع شوي حتى ماتقبضها جد كتير.
العقرب
عندك ترقية مهمة الواسطة تحركت والورقة رح تتوقع بهاليومين، جهز الهدايا عندك مصاريف كتير هالاسبوع، ركز على موضوع إنو هداياك لازم تكون بالدولار يعني مو تروح تهدي بالليرة السورية، بينخرب بيتك وبتنسحب منك الترقية فورا، الدفيعة كتار سبقهن كلهن.
القوس
طيب وبعدين لأيمت بدك تضل تكابر، هياهن رفقاتك رجعوا لحضن الوطن، بالله عليك ماصار دورك، قوم رجع لك عيني الوطن كبير وحضنو كبير والحكومة رح ترحب فيك، نسيت المتل الي بيقول القط مابيحب غير خناقو.
الجدي
الشتوية عالباب والهم جاي معها، الخيمة مارح تقدر ترد المطر ولا البرد، طيب وبعدين شو الحل، يا دبرلك شي سفرة تهريب يا إما ارجع على بيتك، وقبل ماتتورط اسال الي رجعوا شو وضعهن ادروس خياراتك وقرر، فلكي سناك بينصحك بالوطن، لأن حضن الوطن دافي كتير، بس بالصيف لأن بتكون الشمس حدة، أما بالشتوية فوالله ماضل محل دافي غير بيوت المسائيل.
الدلو
مطنش، مفنش، بايع هالدنيا كلها، يخرب بيتك من حالك من وين بتجيب كل هالتفاؤل؟، قوم وزع منو شوي على هالمحتاجين، بينصحك فلكي سناك تبعد عن كل مايمت للمسؤولين بصلة خصوصاً الأفرع الأمنية هدول مابينمزح معهن بنوب.
الحوت
حبيبي ياحوت اسم على مسمى لهطت لغب على قلبك، حاج ولو اتروك دور لغيرك يستفاد، خلص تقاعد من مهمتك روح ابنيلك فيلا وافتحلك شركة استيراد وتصدير هي فتحت المعابر والقصة فيها رزقة كبيرة وبالحلال.
