الوضع العلماني بالبلد مو عاجبني بنوب.. خدوني أوروبا وشوفوا كيف بدرغل علمانية درغلة
سناك سوري-رحاب تامر
«الوضع العلماني بالبلد مش عاجبني بنوب»، يقولها “سعيد بن سوري العلماناتي” لصديقه “شفيق هامل الفروضاتي”، الذي يعتبر أن العلمانية مجرد مؤامرة كونية تستهدف الإيمان في الشرق، (والمؤامرات بتتناسل زيها زينا احنا الشرقيين بالضبط، حتى في سباق مين قادر على التناسل أكثر).
“سعيد العلماناتي” دافع عن فكرته وعن العلمانية، التي تتيح له قدراً أكبر من الحرية في التعبير عن آرائه، وعيش حياته بالطريقة الأوروبية بعد أن فشلت كل محاولاته في الوصول إلى “أوروبا”، أما “شفيق هامل الفروضاتي” فهو شخص نمطي مهمته أن يقول لا في وجه أي تغيير قادم، فكيف إن كان هذا التغيير يقترب من الدين!.
-يا سعيد على شو كامش العلمانية وداير فيها، لتكون مفكر حالك بأوروبا؟
-إي وشو بيردنا نكون بأوروبا، مو شايف كيف تطوروا بعد ما طبقوا العلمانية
-يا عمي هني مجتمع ونحن مجتمع ما بتظبط ما بتظبط
-تعال لهون وقلي، حضرتك كمسلم بتصلي الخمس مرات باليوم؟
-لا
-بتأدي الزكاة
-ما معي أديها، بس أكيد التجار الكبار عميأدوها؟
-طب الحكومة يلي قالوا إنها قالت إنو العلمانية ما بتناسبنا عمتطبق واجباتها تجاه المواطن
-لا تخليني اطلع من حالي، قال واجبات قال
-طيب إذا هيك الوضع، وما كتير متمسكين بالدين وفرائضه ليش رفض العلمانية؟
-لأنو خصوصيتنا ما بتظبط تكون علمانية؟
-شو هي خصوصيتنا؟
-كمجتمع شرقي يعني
-شو يعني مجتمع شرقي؟
-عايش بشرق الكرة الأرضية يعني، أخي إنت ليش عمتعجزني هالقد، ما بحب العلمانية ما بحبها.
يضيف “هامل الفروضاتي”: «بالله عليك تخيل مرتي المستقبلية بكرة ترفع صوتها بوجهي أو تخالفلي طلب، تخيل كمان إنو أختي تحب وتتمعشق وتحكيلي عذاباتها، أو شوف تنين عميبوسوا بعض بنص الشارع والوضع يكون طبيعي وولادي الصغار يشوفوه طبيعي ويتربوا عليه».
العلماناتي: مين مفهمك انو العلمانية هيك.. انت فهمان العلمانية غلط
الفروضاتي: لكن شو العلمانية؟
العلماناتي: هي إنو لا يجوز أن يشارك الدين في المجالات السياسيّة والاجتماعيّة للدول،[١] وبعرفوها كمان بأنها نظام فلسفي اجتماعي أو سياسيّ بيرفض كافة الأشكال الدينية، من خلال فصل المسائل السياسيّة عن عناصر الدين،[٢] ومن تعريفاتها كمان أنها الآراء يلي بتسعى إلى استبعاد الأُسس الدينيّة عن كافة الشؤون المحليّة المدنيّة للدول.
الفروضاتي: خيو أنا ممكن أقبل العلمانية بحالة وحدة، إنو تزيد الرواتب وتتحسن معيشتنا!
العلماناتي: أيواه، هلا إذا في أمل واحد بالمية نقدر نقنع الحكومة تصير علمانية، حنفقدوا وتصير الحكومة دينية تتمسك بالإيثار والتضحية والقناعة
الفروضاتي: هلا الأهم، لا تاخد بحديثي أنا هيك لأن المجتمع هيك، إذا صارتلك سفرة على أوروبا تذكرني وخدني، وهنيك شوف كيف رح درغل علمانية درغلة.
مراجع عن العلمانية
1- “secularism”, Cambridge Dictionary, Retrieved 7-4-2017. Edited.
2- “secularism”, Dictionary.com, Retrieved 7-4-2017. Edited.
3 – “secularism”, The Free Dictionary, Retrieved 7-4-2017.
اقرأ أيضاً: قيادي بعثي: نحن حزب علماني بامتياز
