حوارات سورية: لا تدع واقع أزماتك اليومية يلهيك عن أبراج وملاعب غولف المستقبل

خزامى: ليك يوسف انت بحاجة نضارات ما فيك تضل عم تكابر وما عم تحطا

يوسف: لا يا عيني .. هي تكاليف ع الفاضي  والدنيا آخر الشهر ما في داعي خبرك يعني

سناك سوري _ محمد العمر

خزامى: هلأ كل ما قلتلك ع شغلة بتقلي آخر الشهر .. بعدين يا أخي هي صحتك كمان مو رفاهية

يوسف: أي معلش معها معها بتطيب شو رح يصرلا يعني ازا استنت للراتب الجاي

خزامى: لا حبيبي العين ما بتنطر الراتب وازا تركتا هيك رح تتراجع أكتر .. هي عم خبرك

يوسف: طيب أي شو بتريديني اعمل .. ما ضل حد يديننا أصلاً

خزامى: اطلب من الشغل .. مو في عندكن مستوصف بالمديرية؟

يوسف: ستي مرحبا مستوصف .. دكتور العينية بيجي يومين بالسنة عيد الشجرة ومهرجان القطن

خزامى: بس ما معقول تضل حالتك هيك .. أي ما عم تشوف بالمرة

يوسف: فظاعة شو بتكبري الأمور .. هلأ أنا ما عم شوف؟ ليكني شايفك

خزامى: أي حبيبي عم تشوف ع القريب بس ما عم تشوف ع البعيد .. بدك نضارة ع البعيد انت شو هالحكي

يوسف: ودخيلك شو رح شوف ع البعيد يعني .. م المكتوب مبين من عنوانو .. ليكوه القريب شو واضح .. وبلا نضارة بيضل واضح .. قريب مشحّر كلو مسخرة وواسطات ومحسوبيات وفلان من هونيك وعلان كان من 14 سنة … وكيلو الجاج 90 ألف وكيلو البطاطا 7 آلاف .. وعملة جديدة ما حدا عم يفهم عليها .. وناس بالشارع عم تحكي مع حالا وشو بدي عدلك لعدلك

خزامى: شفت يا يوسف .. هي مشكلتك بالضبط .. ما عم تشوف لبعيد .. راسك ما بعرف كيف عم يغطس بالقريب ما عم يطلع

يوسف: ليش دخلك شو شايفتيلنا حضرتك عن بعيد .. اسمو ماشالله عنك مانك بحاجة نضارة لتشوفي عن بعيد

خزامى: ولو انك عم تتمسخر بس معلش .. شايفتلك مشاريع أبراج سكنية 5 نجوم .. تزيين ساحة الأمويين للمرة 116 .. تدشين دوارات مع نوافير .. مولات وفنادق كلها من 5 نجوم وفوق .. منتجعات وملاعب غولف .. مطاعم انترناشيونال ومشاهير من كل أنحاء العالم

يوسف: عفواً عفواً ولو بدي قاطعك يعني لأني هون ع القريب عم شوف شغلات ممكن تنزعلكن مزاجكن .. يعني ازا ما فيا سئلة في شوية مخيمات ع شوية أحياء صفيح وعشوائيات .. وفي نسبة قليلة مو أكتر من 90% تحت خط الفقر .. هدول شايفينن شي؟

خزامى: لا والله انا نسيانة نضارة القريب بالبيت عم ضل ع البعيد.