أخر الأخبارالرئيسيةرياضةسناك ساخر

مواطن يقرِّش قيمة صفقة بيع “مبابي” عالليرة والواقع المعيشي السوري

ماذا يمكننا أن نفعل بقيمة عقد مبابي.. لاعب باريس سان جيرمان المعروض للبيع

أثار الحديث عن صفقة بيع “كيليان مبابي” من قبل فريقه “باريس سان جيرمان” الفرنسي بمبلغ يقدّر بـ 200 مليون يورو، خيال مواطن سوري يفكّر في راتبه وظروفه والمعيشية حتى تحرّك معه العصب الوركي حين اكتشف الأرقام.

سناك سوري – خاص

لكن بعيداً عن تحريك التهاب العصب الوركي المتحرك أصلاً لدى معظمنا. ماذا يمكننا أن نفعل بقيمة هذه الصفقة التي تصرف على لاعب كرة قدم واحد؟.

كم تبلغ قيمة الصفقة بالليرة السورية؟

لمن لا يعرف ماهو التقريش فإنه عبارة عن مصطلح شعبي يُستخدم عندما يحسب المواطن السوري الذي يقيم في الخارج أو يجري زيارة للخارج مشترياته بالليرة السورية.

وبحساب الليرة السورية حالياً وفق المصرف المركزي مقابل اليورو فإن كل 1 يورو يعادل 11013 ليرة تنطح ليرة. (هذا اليورو نفسه يلي كان بعادل أقل من 60 ليرة قبل 12 سنة).

إذا ضربنا 200 مليون بـ 11013 أكيد بيطلع معنا رقم أكبر من أنه يتسع للآلة الحاسبة. بس إذا استعنا شوي كمان بالورقة والقلم بيطلع عالسوري حوالي  220,26 وبجانبها 8 أصفار.ما حطيناهم ع مبدأ خلي «الصفار ع جنب» بصوت “طوني حنا” بدل “الشوارب”. ( الرقم كتابةً هو 2 تريليون و202 مليار و 600 مليون ليرة سورية).

كم يعادل هذا المبلغ في حياة الموظف السوري؟

قبل ما نحسبها أمانة ما تآخذونا إذا غلطنا بالحساب لأنه الصفار عدد كبير كثير بس إنو خطأ صغير مارح يضيع المعنى الجوهري أكيد.

قيمة صفقة بيع “مبابي” المعروضة حالياً تعادل في حياة الموظف السوري 14 مليون و684 ألف شهر ينطح شهر. طبعاً الحكي هاد بينطبق ع الموظف فئة أولى أبو راتب 150 ألف بالشهر.

يعني بالمجمل بيحتاج الموظف “فئة أولى” لحوالي المليون و223 ألف و666 سنة حتى يجمع قيمة عقد “مبابي”. مع أنو هذا المواطن عم يساهم بالصمود والتصدي وقهر الاستعمار ومواجهة الليبرالية الحديثة وبناء المجتمع العربي الموحد. ومبابي يا دوب عم يشوط هالطابة ويسجل أهداف ويزقفله الجمهور.

ولبين ما يتصمد هالمبلغ بتكون عظام “مبابي” صارت مكاحل وبكون الراتب زاد كم ألف.

كم بيت في سوريا ينير راتب مبابي… طاقة شمسية

بما أن الكهرباء هي الشغل الشاغل للسوريين بظل حياتهم المظلمة حالياً مع قلة ساعات وصلها وكثرة ساعات تقنينها.

وبمناسبة كثرة الحديث وتكراره عن استخدام الطاقة البديلة وفي مقدمتها “الشمسية” قررنا حساب العقد على الطاقة الشمسية.

وبحسبة أبسط من الحسبة الأولى بيطلع معنا (الرقم أبو الأصفار اللي على جنب تقسيم 20 مليون وهي تكلفة ألواح طاقة شمسية مقبولة وبتجيب كهرباء. فإن نتيجة القسمة تؤدي لتركيب طاقة شمسية في 110 آلاف و130 بيت سوري)..

وإذا كنت مستثمراً جيداً فأكيد شو بدك بوجعة الرأس؟ ليش لتاخد لاعب ممكن ينصاب ويقعد عالدكة… أو يقرر يرحل عنك بأي لحظة؟!. روح اشتري كم لوح طاقة وتاجر فيهم وبعد سنتين بتشتري “مبابي”.وبتكون استفدت من مشروعك سيد راسي.

الفلافل طعام الفقراء في زمن الغلاء (صار غالي كمان)

قيمة عقد الرفيق “مبابي” من دون راتبه طبعاً ممكن تشتري 440,520,000 سندويشة فلافل أم الـ 5000 ليرة،.وبتوزعها ع هالمساكين (مساكين نص العالم, مو بس مساكين سوريا).

وهيك بتكسب حسنات كثييير كثييير كثييير. أكثر من الجمهور يلي رح يتابع أخبار “مبابي”.

هلا بس تخلصوا قراءة هالمحتوى أكيد رح يخطر ببالكم شو استفدنا من هالحكي… صراحة ولا شيء بس إنو معقول راتب قيمة عقد لاعب واحد بنادي ممكن تحل مشاكل كهرباء لـ 110 آلاف بيت مظلم.. هيك كثيير كثيير..

أنا بقترح نرجع عاللعب النظيف ونوظف هالمصاري بالاستثمار الإنساني النظيف.. بلكي ينوبنا طرطوشة تنمية.

بدائل كيليان مبابي بالسوري

يشار إلى أن هذا الرقم الذي نتحدث عنه بسعر “مبابي” ليس تخيلاً.وإنما هناك عرض من “الهلال” السعودي للتعاقد مع “كيليان” يفوق هذا الرقم حسب ما تحدث “فابريزيو رومانو” الصحفي الإيطالي الذي يعتبر الأكثر مصداقية حول سوق الانتقالات.

سيدي عالم بطرانة بدها تتعاقد مع “مبابي” وعالم عم تحلم مجرد حلم تركب طاقة شمسية وترتفع رواتبها. يعني الشغلة “اختلاف ثقافات” مو أكتر.

وأنتم أخبرونا، لو امتلكتم ثمن “مبابي” ما المشروع الذي تختارون العمل به؟!

زر الذهاب إلى الأعلى