حسان خلال قيلولة أبو نادر..يشرح لنا كيف سننتخب غدا
بكل مركز في مكان معزول ببرداية (ستارة) مشان تصوت حرية ضميرك من دون ضغط
سناك سوري-رام أسعد
بعد أن عرفت أهمية الانتخابات المحلية ودورها واخترت المرشحين الذين سأقوم بانتخابهم (بأم الطنافس الفوقا والتحتا والتخريمة ماطلعوا مرشحين تلاتة بيحققوا آمالي) لم يبقَ أمامي سوى الانتخاب ولأنني شخص فضولي فقد توجهت للمخفر لأعرف من شرطي ضيعتنا ”حسان“ كيفية الانتخاب وبعض حقوقي في هذا اليوم الموعود.
اقرأ أيضاً: سلنكو يوضح لنا سريعاً شو يعني إدارة محلية
وبعد دخولي خلسةً للمخفر (وقت قيلولة أبو نادر) انتظرت ”حسان“ لحين انتهائه من قلي البيض وسألته:
-ولا حسان..بدي تحكيلي كلشي بتعرفو عن الانتخابات بكرا من طقطق للسلام عليكو
حاضر سيدي ولا المواطن..أولاً الانتخابات بتبلش الساعة 7 الصبح لل7 المسا وممكن يتم تمديدها بقرار من اللجنة العليا للانتخابات للساعة 12 ليلاً على الأكثر ببعض المراكز أو بجمعيها..
ثانياً قبل ما تبلش الانتخابات يعني شي الساعة 7 إلا ربع بتفتح لجنة المركز الانتخابي الصناديق أمام وكلاء المرشحين ليتأكدوا من إنها خالية من أي ورقة وممنوع فتح الصناديق بعدها لحين يبلشو بفزر الأصوات.
ثالثاً (نفختلي قلبي يحمو لقلبك ما أسئلك) بكل مركز في مكان معزول ببرداية (ستارة) مشان تصوت حرية ضميرك من دون ضغط بعد ما يعطيك رئيس اللجنة عمك صالح مغلّف عليه توقيعو وختم اللجنة وفيك تجيب معك الورقة مطبوعة جاهزة او مكتوبة أو فيك تكتبا ورا الستارة فهمت أو بعدلك مواطن أفندي؟
-لا لا فهمت عليك فهمت عليك حسان بيك الكبير بس كمان سؤال..بيحقلي انتخب بأي مركز بالبلد ما؟
-لاااا العما فعيونك شو انتخابات رئاسة الجمهورية لتنتخب وين مابدك بالبلد؟ لا حبيبي بتنخب بأي مركز بالدائرة الي انت بتتبع إلها وهاد بيتسمى (موطن انتخابي) وبيحقلك تنقل موطنك الانتخابي من خلال أي وثيقة رسمية أو بطاقة أو هوية نقابية تثبت إنك مقيم بالموطن الانتخابي الي بدك تنتقل عليه وبتورجي اللجنة الانتخابية هي الوثيقة..
-موشي مواشي..أمرك أوامرك.. حاضر حواضر.. طيب عمي حسان أنا بعرف أنو المجلس البلدي طالبين عليه 5 مقاعد ع الفئة أ و6 ع الفئة ب طيب فيني صوت ل2 بس بالفئة أ و لمرشح واحد ع الفئة ب؟
-اي طبعاً فيك بس إذا صوتت لعدد أكتر من المقاعد المخصصة بينحذف الاسم الزائد الي بآخر القائمة..
-طيب حسان كمان سؤال..
-لا سؤال ولا جواب اتركني اندفس آكل وإلا باخدك ع النظارة بشلحك مع أسعد وجودي وبرفعك فلقة بخلي صواتك توصل لقبرص ع قولة الياهمالالي وهلأ روح من هون قبل مايفيق أبو نادر وياكل معي..
*هذه المادة أعدت بالتعاون مع حملة#دورك
اقرأ أيضاً: مختار ”أم الطنافس“ يوضح للناخبين أسس إختيار مرشحينهم.
