سناك سوري – مواطن مثالي
باعتبار أنني مواطن من هذه الدولة العظيمة صامد فيها مثل نخلة يابسة في صحراء قاحلة، لا أستطيع إلا أن أشكر الحكومة على ساعات التقنين الطويلة!!!… نعم نعم أنا أشكر الحكومة ولأسباب كثيرة لا تعد ولا تحصى.
وبالعامية بدي اشكرها لأنها بتقطع الكهرباء عنا بالليل وبالنهار بتحرمنا نشغل الغسالة أكثر من مرة وحدة على مدار الاسبوع (ويادوب تخلص الوجبة).
بدي قلها ممنونك لأنك نسيتيني فكرة استخدم المكواية أو حتى شو يعني مكواية وخليتيني اطلع بثياب مجعلكة وقول عنها موضة.
الحكومة متفضلة عليي لأنها منعتني عن استخدام المايكرويف لتسخين الخبز يلي عم جيبه بالبطاقة الذكية بلكي يصير بييتاكل، بس بدي لومها شوي لأنها كمان بساعات التقنين الطويلة حارمتني شغل التلفزيون واتفرج على أخبار الوطن على شاشاتنا الوطنية بس معلش هذا أكيد كرمال مصلحتي.
تخيل مثلا ياصديقي المواطن المثالي… انو يكون فيك تشغل الإنارة بالبيت قد مابدك وتشحن اللابتوب على كيفك، ويصير عندك فرن عالكهرباء ومرتك تاخد مجدها عالسيشوار لتنشف شعرها منشان ما تمرض بعد الحمام، وابنك يجيب لمبة كبيرة لتساعده يشوف كتاب الوطنية منيح خلال القراءة والتحضير للامتحان، أو بنتك قبل ما تروح عالجامعة تشغل الفير وتظبط شعرها أو انت لاسمح الله تستخدم مكنسة الكهرباء لتنظف الصالون لان ظهرك موجوع ومرتك مكلفتك بها المهمة يلي مافيك إلا تعملها (طلبات الحكومة المنزلية أوامر).
تخيل…. تخيل منيح ها… إذا فيك تستخدم كل هدول بحرية قديش رح تطلع فاتورتك، إذا عرفت إنو أسعار الكهرباء تعدلت وصار 600 كيلو واط بكلف جيبك المليان ديون 1200 ليرة، بينما ثاني شريحة يلي هي بين 600 و1000 بتكلفك بس 2400 ليرة يابلاش وهدول يادوب ينوروا عليك البيت، بينما الشريحة الثالثة يلي هي بين 1000 و1500 بتكلفك يادوب 10000 ليرة من راتبك الخرافي، أما الشريحة الرابعة يلي هي بين 1500 و2500 سعرها 90 ألف ليرة.
المهندس “محمد ياسين” يلي عمل تحذير للمواطن حول سعر الكهرباء الجديد وكارثته على جيبته قال بمنشوره إنو الشريحة بتنحسب بالجمع يعني مثلاً إذا استهلكت 1500 واط يعني انك استهلك 3 شرائح ومجموعها 13600 ليرة سورية.
“ياسين” أيضاً عطانا تبسيط واضح وصريح وصادم إنه البيت العادي الذي لا يحوي سوى سخان و بقية مستلزمات المنزل بدون مكيفات أو سخانات تدفئة سيستهلك في الدورة بحدود الـ ١٠٠٠ كيلو حتى لو كان التقنين ساعة وصل مقابل ٥ قطع أما في حال مكيف أو سخانات تدفئة أو طعام فسيتجاوز الـ2000 و عندها ففاتورتك تصل للمئة ألف أو أكثر.
إذا عزيزي المواطن بناء على هذه الأسعار اللذيذة هل عليك أن تشكر الحكومة على التقنين وتتمنى دوامه أم تريد إلغاءه وتزويد منزلك بالكهرباء 24/24 ولحق على صرف ودفع!!!؟؟
اقرأ أيضاً تعرفة جديدة للكهرباء .. ومسؤول يعتبرها تحفيزاً للمشتركين
