البحث عن زواج مثالي – رنيم لبش

بكل العالم عموماً يعني، بيلتقى الشب والصبية بيتعرفوا بيحبوا بيرتبطوا بينخطبوا بيتزوجوا، بس عنا الوضع مختلف لأنو ما بيكفي انو التنين بيحبو بعض، لازم عيلة أهلو وعيلة أهلها يحبو بعض.

سناك سوري _ رنيم لبش

وإذا العيلتين حبّو بعض، ساعتها ما ضروري ولا مهم العريس والعروس يحبّو بعض، وما دام العيلتين حبّوا بعضن اعتبر الموضوع انتهى، والقصة تكلّلت بموافقتهم يعني لازم تنتهي، حتى لو كان العريس من المريخ والعروس من الزهرة.

النوع التاني من الزواج بقا، هو أنو الشب يتزوج بنت عمو أو بنت خالو أو بنت خالتو، ولو كان هو بيعتبرا متل أخوه حمودة، أو هي بتشوفو متل “اليوزباشي” لما يلاحق نصار ابن عريبي.

الأسعار مو غالية… راتبي ما بكفيني اشتري

بتمر الطبخة بمراحل علمية دقيقة: تسميع، تلطيش كلام، وبعدها بيفتحوا الموضوع معك بشكل مباشر، وإذا فكرت تقول “لا”… بلّشوا الحرب عليك، تبدأ من عدم دعوتك للأكل، ولا تنتهي بعدم غسل ثيابك… وكلشي بيصير سلاح، والأحلى أنو اللي بيتزوجو من “الأقارب” بيكتشفو أنو هنن حاظرينن ع السوشال ميديا، وآخر مرة زارن كان عمرو 7 سنين.

وطبعاً في طريقة معروفة ومجربة للزواج، لما تروح الأم من بيت لبيت برحلة بحث عن “عروس” لابنها، مقابل أم عم تاخد بنتها من عرس لخطبة لاستقبال، بخطة تسويقية محكمة قائمة على العرض بطرق جذابة، بحثاً عن عريس المستقبل وأمو.

نسبة كبيرة من مشاريع الزواج من هالنوع بتفقس قبل مرحلة كتب الكتاب، بسبب خلافات جانبية تتعلق بمبلغ “المهر” وحجم الصيغة المطلوبة، وقت يكون أهل العروس مفكرين أنو العريس هو شخصياً اللي سرق دهبات أبو ابراهيم.

بكالوريا سوريا.. عقدة تقرير المصير

أما أخطر نوع من الزواج؟ الزواج عن حب. إذا قررت تمشي بهالطريق… استعد لتحارب الأهل والقبيلة والمجتمع، حرب شعواء، أشد من حرب البسوس، وساعتها بتسمع من ناس متزوجين روايات عن تجاربن المريرة وشعورن بالندم ع هالاختيار، وغالباً بيكونو هنن الأهل اللي تزوجو عن حب لما كانوا شباب، بس بيرفضو انو ولادن يتزوجو عن حب.

بالنهاية، رح تكتشف بعد ما يمشي فيك العمر سنة ورا سنة أنو الزواج هو ع الأقل “شرّ لا بدّ منه”، لهيك بدك تاخد احتياطاتك لما تتزوج أنك تطلع بأقل الخسائر مو أكتر.