أحلى الهزائم.. هزيمة زوجي أثناء دفع الفاتورة
سناك سوري-رحاب تامر
أخدتني الحمية وقررت أن أرد لرفيقتي عزائمها الكثيرة، دقيتلا وقلتلا يافلانة تعي اليوم جمعة ابعدي عن زحمة المدينة واطلعي لعندي على هالجبل حيث الفي والهواء المنعش وهدول القصص، وبلا طول سيرة اقتنعت رفيقتي بعد إلحاحي وقررت تعملي زيارة عائلية.
جبتو لزوجي وقلتلو ليك يارجال هي فلانة بتعرفها وبتعرف قدي بتعزمنا وبتدللنا وقت نروح لعندا أقل منا نجبلنا فروجين نطلع نشوين بالغابة وننبسط معها ومع زوجها، قلي أي الله معك حق وأنا جاهز لكل خيار.
ووصلت رفيقتي لعندي ونسيت قلكن إنو رفيقتي بتحب تدلل حالا كتير والشهادة للله بيلبقلا نفس طيبة وروح حلوة وزوجها متلا وحبة مسك، المهم قبل مااقترح عليها الفكرة باغتتني بالقول يالله خدينا على شي مطعم وخلافو من الي اكلاتن طيبين ونضاف، بلعت ريقي اتطلعت بزوجي يلي رفع الراية البيضا بعدين رجعت ابتسمت وقلتلا ولو هيا ننطلق.
انطلقنا وانا عماحسبها واضربها قلت يالله الشغل مقبضني والجيبة عامرة ومعلش بلا 10000 ليرة.. وصلنا عالمطعم وانا قلتلن انتو طلبو وكل ماطلبت طبق معدتي تزقف وقلبي يوقف ومخي يحسبها وضليت هيك كل ماتجددت الاركيلة وصحن السلطة والبيرة ولما اجا وقت الحساب كنت حابة قلن الله بيحاسب الجميع وافتح حزام ناسف وارتاح.
وانا عمفكر بالقصة بفيق من خيالي على صوت زوجها وزوجي عميتحالفوا، وللأمانة شجعت زوجها كتير ويارب ينهزم زوجي قدامو، والحمد لله غلب زوجها وانا كان جاي عبالي زقفلوا وباركلو بالنصر المؤزر، وهيك دفع الفاتورة الي طلعت قد راتبي!! بمطعم شعبي!! حق 2بيرة ونصية عرق وشوية مقبلات وفروج وكيلو لحمة وموالح.. اه لحظة موالح شو نحنا ماطلبناها رحت بدي قلو ورجع الالفين رفيقتي وزوجها مارضيو قال خلص ولو هني الفين ليرة، بس محسوبتكن مااقتنعت قلت لزوجي راح قلو للمحاسب الي استغرب ورجع لجوزي الف جابا جوزي المنتصر عطاها لزوج رفيقتي وانا ماحبيت روح زهوة النصر تبع جوزي وقلو كانو 2000 قلت حرام بكفي هزيمة الفاتورة السعيدة.
