الوسواس القهري.. العلاج الدوائي ليس الوحيد

الوسواس القهري هو مجموعة أفكار ملحة ومزعجة بتدفع صاحبا أنو ينفذ أفعال معينة، بيرفضها بالبداية، ولكن بعدين بيعملها مرغماً. مشان يتخلص من هاد القلق، ولكن بعد فترة بترجع أفكار تانية بتسببلو قلق وبتجبرو يخضع وينفذ.

سناك سوري-استشارات طبية

مريض/ة الوسواس القهري بيتميزوا بإنو بيعرفوا الشي يلي عم يساووه غير منطقي، ولكنه بيحسوا حالن مجبرين على هاد الشي، لحتى يتخلصوا من القلق.

الأفعال الوسواسية ممكن تكون نظافة مفرطة، يعني المريض/ة بيضلوا يغسلوا إيديهن بشكل مبالغ به، أو خايفين على طول من الخطأ. أو خايفين يعملوا شي مو منيح، أو من الفضيحة بشكل غير منطقي، أو بيضلوا يفكروا انو ما سكر الباب منيح أو ما أغلق جرة الغاز بإحكام (في حال وجودها).

ممكن تكون هي الشغلات موجوده عند كل الناس، ولكن لا تعتبر مرض لحتى تصير تأثر بشكل سلبي على حياة المريض أو المريضة. المهنية أو الدراسية أو الاجتماعية أو الأسرية.

مابدنا نكتب نصائح كتير، لأنو ضغوط الحياة صايرة كتير متعِبة ومرهِقة، فالنصيحة الذهبية لمرضى الوسواس القهري انو نطلب المساعدة، من الطبيب النفسي. أو المعالج النفسي.

مو شرط يكون العلاج الدوائي هو الخيار الأول، في علاج سلوكي معرفي يركز على تثقيف المريض حول طبيعة مرضه. وتدريبه على مواجهة الوساوس والمخاوف دون الخضوع لها، وإعادة دمج المريض بالحياة الاجتماعية مشان يخف تركيزه على نفسه.

وفي العلاج الدوائي، ممكن ياخد مريض أدوية الاكتئاب نفسه مثل مضادات الاكتئاب ثلاثية الحلقة، أو مثبطات عود التقاط السيروتونين. طبعاً بعد مراجعة الطبيب النفسي المختص، لأن الأمراض النفسية معقدة جداً وممكن تكون أعراض الوسواس القهري مخبية مشكلة تانية. وطبعاً لا الصيدلي ولا الطبيب العام مدرَّب لحتى يشخص ويوصف الدواء.

أعد المحتوى الدكتور “غدير برهوم” – موقع سناك سوري

اقرأ أيضاً: أهم الأسئلة الشائعة حول المينوكسيديل أحد أهم أدوية علاج تساقط الشعر