نقص فيتامين ب 12 أحد أسباب فقر الدم

مو دايماً فقر الدم سببه نقص الحديد، ممكن يكون ناجم عن نقص فيتامين ب 12 يلي هوي ضروري لتصنيع كريات الدم الحمراء.

سناك سوري-استشارات طبية

بيكثر فقر الدم بعوز ب 12 عند الأشخاص يلي بيعملوا حمية نباتية (يعني عند الأجانب، والسوريين حالياً) والسبب بإنو هاد الفيتامين. ما بيتواجد غير باللحمة والبيض، يعني المشتقات الحيوانية حصراً (لحمة وبيض، يبدو المستحيل صار سوري بامتياز).

غالباً ما بتبين أعراض فقر الدم بعوز ب12 لبعد فترات طويلة من نقصه لأن مخزون الكبد من هذا الفيتامين بدها 3 لـ5 سنوات لتنضب. (مو متل مدخرات السوريين من الصمود والتصدي التي تدوم وتدوم).

بتشمل الأعراض المعروفة لفقر الدم من نعاس وتعب وخفقان، ولكن ما يميز هاد النوع من فقر الدم هوي الأعراض العصبية. مثل الخدر أو التنميل بالاطراف بسبب تأثر الحبل الخلفي للنخاع الشوكي بنقص ب12.

طبعاً ممكن يصير فقر الدم بعوز ب12 بكتير أمراض مثل أمراض الكبد وضمور مخاطية المعدة وتناول الأدوية مثل مضادات الحموضة (دوا المعدة) والميتفورمين. وداء الرتوج، وفرط التكاثر الجرثومي وديدان الأمعاء يلي بتتغذى على فيتامين ب12.

الحل بيكون من خلال تعويض فيتامين ب12 عن طريق حقن عضلية، بعد إجراء استشارة طبية وتحاليل معينة (وليس بطريقة عشوائية).

أعد المحتوى الدكتور “غدير برهوم” – موقع سناك سوري

اقرأ أيضاً: هل جيل الشباب الحالي أضعف من الجيل القديم صحياً؟

المقالات المنشورة لا تعبّر بالضرورة عن رأي الموقع