فلسفة باب السرفيس .. شو يعني “تشاركية”؟

كان السرفيس ماشي متل سلحفاة ميكانيكية، وصوت المحرك عم يصيح متل واحد عم يطلب النجدة، وهالركاب محشورين جوات هالصندوق الحديدي المصدي الماشي برحمة الله.

سناك سوري – مواطن تشاركي

الراكب اللي قاعد ع المقعد القلاب جنب الباب، كان عم يحاول يلملم إجريه كرمال يتسكر الباب، ويلتفت للراكب اللي جنبو ويقول: «دخلك عم أسمع هالأيام بالأخبار كلمة تشاركية، شو هي يعني؟ رح يشاركولنا بالمازوت مثلاً؟».

ابتسم الراكب التاني اللي كان ماسك مسكة السقف كرمال ما يوقع مع كل جورة، وقال:
_ لا يا أخي، هي كلمة أكابرية شوي.. المقصود فيها التشاركية بين القطاع العام والقطاع الخاص.

_ أهاا.. يعني الدولة والتجار بيشتركوا كرمال يريحوا المواطن؟.

_ “ممم.. مو بالضبط، القصة بتشبه هاد السرفيس تماماً!.

صفن الزلمة وقلو:
_ كيف يعني بتشبه السرفيس؟ قصدك مهترية وعم تطالع دخنة والشوفير بيحشر الركاب حشر.

رد التاني بضحكة خفيفة:
_ شوف معلم.. السرفيس والخط والموقف هدول ملك الدولة يعني قطاع عام، بس الشوفير والمازوت والمحرك اللي عم يطالع دخنة هدول ملك القطاع الخاص، لما بيشتركوا مع بعض كرمال ينقلوك من محل لمحل، هي اسمها تشاركية.

_ حللوو.. طيب ونحن الركاب شو شغلنا بهالتشاركية؟.

_ نحن المواطن.. دورنا بالأول والأخير ندفع الأجرة، وإذا عطل السرفيس بالطريق، التشاركية بتقول إنك بتنزل بتدفش معن، وبترجع بتركب وبتدفع الأجرة كاملة بدون ما تفتح تمك.

حوار بين عابرَين .. شو يعني خطاب كراهية؟

صمت الأولاني شوي وهو عم يراقب التنجيد المبخوش بالسرفيس وبعدين سأل:
_ طيب وإذا خط السرفيس صار فيه نقص وما عم يكفي، ومصاري الشوفير ما عم تكفي ليغير محرك؟.

_ هون بقا بتجي الفكرة الذكية للتشاركية، بيجي المستثمر بياخد الخط، وبيحط سرفيس جديد فيه مكيف وصوت موتور ناعم، وبدل ما تدفع 5000 ليرة، بتصير بتدفع 10 آلاف، الخط بيضل للحكومة، والربح بيكبر للمستثمر، وأنت بتوصل مرتاح.. بس جيبتك هي اللي بتهتري.

اندهش الزلمة وهو عم يطلع بباب السرفيس اللي عم يهز وقلو:
_ يعني بالتشاركية الدولة بتعطي الخط، والمستثمر بياخد الأرباح، ونحن بنضل عم ندفع حق التطور؟.

_ تماماً.. هي اسمها بلغة الاقتصاد توزيع المخاطر، يعني الربح إلن، والمخاطرة والجيبة الفاضية عليك أنت.

وبهاللحظة هدى السرفيس فجأة، وصرح الشوفير وهو عم يرجع لورى: «يلا شباب، عطل الدبرياج، انزلوا دفشولنا إياه شوي كرمال نكفي لآخر الخط».

التفت الراكب اللي ع الباب للتاني وقال بنبرة مليانة حسرة وضحك:
_ اي والله.. أجو ليطبقوا التشاركية معنا عالواقع فوراً يلا انزل ندفش.