حوار بين عابرَين .. شو يعني خطاب كراهية؟
كيف الناس بتكره بعضا؟ وكيف صاحب الخطاب بيعلّم جمهورو ع الكراهية؟
_ دخلك شو هي اللي طالعين فيها تبع “خطاب الكراهية”؟ يعني في واحد عندو خطاب قدام ناس بيكرهن؟
_ لا هو خطابو قدام ناس بيحبوه وبيحبن .. بس كرمال يكرهو غيرن .. يكرهو اللي بيكرهن هو شخصياً
سناك سوري _ دمشق
_ ايوا .. طيب وإذا كان في حدا من اللي بيكرهن واقف وسمع الخطاب؟
_ ضروري يكون موجود هاد
_ ليش بقا؟
_ مشان يروح يخبر جماعتو
_ اي وشو بيعملو ساعتا؟
_ بيروحو بيعملو خطاب متل الأولاني
_ شو بيحكو فيه
_ بيخبرو اللي بيحبوهن أنو هداك بيكرهنا وجماعتو بيكرهونا .. فنحن من واجبنا شو؟ نكرهن طبعاً
_ أي وآخرتا؟
_ آخرتا كلو بيكره كلو
_ بس ليك والله التانيين معن حق .. لأنو حكو الحقيقة فعلاً هداك بيكرهن
_ أي بس هنن ما بيقولوها هيك ع حالا
_ لكن؟
_ بيصيرو بيعملو متل الأولاني
_ ليه شو عمل الأولاني
_ أخي انت ازا بدك ياني اكره حدا ما بتجي بتقلي ليك هداك روح اكرهو .. لاه .. بتقلي هداك الزلمة حرامي مثلاً وبيضرب مرتو وولادو كل يوم ورمى أمو بالشارع وبياكل مال اليتيم وازا فيك تقلي انو هو اللي قتل ولي عهد النمسا وعمل الحرب العالمية ما رح تقصر
_ أيوااا .. بالله عامل كل هاد؟ بشرفي كرهتو
_ وك لاه لاه .. بس يعني لتخلي واحد يكره التاني بتصير بتخترع قصص عن التاني كلها كذب بس المهم تخلي الأولاني يكرهو .. وتتأكد أنو صار يكرهو منيح وولا يمكن يتصالحو
_ أي بس كمان الواحد لازم يكون واعي ما يصدق كل شي .. هدول اللي بيصدقو جهلة مو متلنا
_ أيوااا .. تماماً هنن بيستعملو قصة مو متلنا وما بيشبهونا وجهلة ليخلوك تكرهن للتانيين
_ والله ضيعتني انت والأولانيين والتانيين .. خيو قصدي انو نحن المثقفين ما بتمرق علينا هالقصص
_ مبلا بتمرق وحياتك .. أكبر مثقفين مو بس بتمرق عليهن لا بل بيسوقو فيها وبيكونو قادة خطاب الكراهية
_ بيكونو مانن مثقفين منيح
_ وكيف بقا بيكونو مثقفين منيح؟
_ لازم يكونو بيقرو جرايد
_ ممممممم
