أخر الأخبارحرية التعتيرحكي شارع

عرس آل الجود: “الي معو شو بيمنعو؟”

يحكى أن “أبو عبدو التنح” امتعض من عرس آل الجود باللاذقية. والذي كلف على ذمة الفيسبوكجيين أكثر من مليار ليرة. وبلا طول سيرة. فاتح “أبو عبدو” جاره بالسيرة وعلى ذمة الرواي “دار بيناتن” الحديث التالي:

سناك سوري-اللاذقية:

أبو عبدو: “إنو معقول يازلمي. بالوقت الي مافيني عم لاقي بيت لابني لجوزو. يعملو عرس مكلف مليار ليرة؟”.

الجار: “روق شوي. منين عرفت إنو كلف هالقد؟”.

أبو عبدو: “الفيسبوك لك مطروش الخبر طرش”.

الجار: ” الله ياخد هالفيسبوك شو جبلنا بلاوي. عأساس بيت جود خبرو جمهور الفيس بتكلفة العرس وأخدو رأين كمان؟ شبك أبو عبدو روق عحالك يازلمي”.

أبو عبدو: “لك عمي شوبعرفني انا. والله رح اطلع من حالي اقسم بالله. ماعم بعرف طعمي ولادي يازلمي”.

الجار: “إذا ماعم تعرف تطعمي ولادك. لاتزتا برقبة عالم معها وبدا تفرح لك عمي. مصاريهن وهني حرين فيهن إنت شو دخلك؟ يااخي الي معو شو بيمنعو؟”.

أبو عبدو: “لا تحكي هيك. بلا شي أنا رح جن لك عمي. أنا بمليون ليرة بتنحل مشكلتي. والناس عمتصرف ملايين كرمال شقفة عرس لا بيقدم ولا بيأخر”.

اقرأ أيضاً: الصناعة ستعيد الانتاج إلى ما قبل الحرب.. توقيف 4 مدراء في السورية للتجارة.. عناوين الصباح

الجار: “تعا لقلك هني ماراحوا على لبنان ليعملو عرس متل كتار سمعنا عنهن. هني عملو عرس كبير باللاذقية. اي ومكلف اي. بس دخلك بتعرف إنت كم واحد شغل هالعرس؟ لك يا ابو عبدو في غيرك هلا من الي اشتغلو بهالعرس أخدو اجرتهن وصرفوها عولادن. وعم يدعولن للجماعة بالخير. مو لانو حضرتك مااستفدت. تقوم تقلبها خيانة عظمى. لفها ابو عبدو لفها بقا”.

أبو عبدو: “إي لأني نسيان فكرك وقت راحت بنت صبحي الجود وعملت عرس مطنطن ببيروت كلفها هديك الحسبة”.

الجار: “وان شالله عمرك مانسيت شو الك عليهن انت. روقنا ابو عبدو روقنا شبك يازلمي .رح تطرقن عين للجماعة. وهي هني هالمرة عملولك العرس باللاذقية ليرتاحوا من لسانك. ومع هيك ما ارتاحو شبك يازلمة”.

أبو عبدو: “شحاري والله أنا معتر. لك بس لو انن حسو فيني شوي وبكتار متلي. لكن بتعرف اني فكرت روح عالمطعم محل ماعملو عرس آل الجود. بلكي بقدر باخد عشا مرتب لولادي. لكن والله كرامتي منعتني. وأصلا ماكانو رح يدخلو المشحرين الي متلي”.

الجار: “أبو عبدو قوم لقلك قوم نشعل هالنارة وبخبخ عليها تنجلي. بالدخان والمعسلي. بتفرج أبو عبدو بتفرج. قول الله وقوم امسح وجهك بالرحمن يازلمي. هي اخر مرة رح اسمع فيها انك فتت فيسبوك بقا ها. حيج تسم بدنك لك خيي”.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى