تنكس المفاصل: 6 نصائح ذهبية للوقاية منه
في شي بمتناول اليد ومابدو مصاري وبيساعدك بالوقاية من تنكس المفاصل
تنكس المفاصل أو الفصال العظمي أو خشونة المفاصل، كلها أسماء لالتهاب المفاصل التنكسي، ويلي غالبيتنا رح نعاني منها حتماً بعمر معين. لأنو المفصل مانو عضو أبدي، رح يتعب مع التقدم بالعمر، الجلد رح ينصاب بالشيخوخة ويصير فيه تجاعيد، العضلات مع العمر بتصير أضعف. وهيك الغضروف المفصلي مع تقدم العمر بيفقد المياه يلي داخلة فيه وبيصيرو أقل مرونة وأقل سماكة، وهاد الشي بيعمل تحدد بحركة المفصل وألم عند المشي.
سناك سوري-استشارات طبية
طبعاً هي العملية ممكن تكون أسرع وتظهر بعمر أبكر متل عند مرضى الروماتيزم والمرضى يلي عندن التهابات مفاصل متكررة وبدانة. ومنجلي وتأهب وراثي وكسور وزيادة وزن وغيرها كتير.
العلاجات الدوائية متل الغلوكوزامين غير مثبتة، ويعتقد كثير من الأطباء أنها غير فعالة، وبيبقى الحل الأخير هو تبديل المفصل.
بما انو العلاج صعب، في نصائح ممكن اذا اتبعناها ممكن نأخر عملية تنكس المفصل.
1- النصيحة الأولى:
نشرب مي على طول، ماتعدوا عدد الكاسات، طول مافي مي قدامي بشربا، وكل ما قربت من المطبخ بشربا. الكمية لازم تتضاعف بالصيف، وضروري نعلم أولادنا على هي العادة، لأن متل ما منعرف الماء بيدخل بتركيب الغضروف المفصلي.
2- النصيحة الثانية:
لكل من يعاني من زيادة في الوزن لازم نخففو، لأن الوزن الزائد يعني حمل أكبر على المفصل، يعني تخرب أسرع للمفصل. نخفف وزن بممارسة الرياضة، وخلي الخضرة حاضرة دائماً مع الوجبات، وعوّد الطفل من صغره على تناول الخضار.
3- النصيحة الثالثة:
هي تقوية العضلات، من خلال ممارسة الرياضة بشكل دائم، أو سجل بنادي رياضي. ولكن بدون حمل أوزان ثقيلة، العضلة لما تصير أقوى بتصير تحمل ثقل الجسم وتخفف عبء على المفصل.
4- النصيحة الرابعة:
نحاول ما نتقل الشنتابة لما نكون بدنا نمشي مسافة طويلة، ونحاول قدر الإمكان ما نحمل أوزان.
5- النصيحة الخامسة:
نحاول نستعمل الحمام الفرنجي بدل الحمام العربي، وخصوصاً عند مرضى الإمساك يلي ممكن يضلو فترة طويلة. بالحمام العربي وهاد الشي بيعمل ضغط كبير على المفاصل.
6- النصيحة السادسة:
الحذاء ممكن يكون إلو تأثير كمان على تنكس المفاصل، الضبان المريح تحت القدم بيشيل حمل عن المفصل بنسبة معينة. صح صغيرة ولكنها بتأثير تراكمي بتصير محرزة.
