فرط التعرق .. العلاج بالبوتوكس وأدوية الاكتئاب أحياناً
ما هي أسباب فرط التعرق وكيف نعالجه؟
فرط التعرق الراحي الأخمصي، هوي مرض شائع عند كتير من الشباب والشابات، وفي الو نوعين، الأولي والثانوي، الأولي هو الأشيع. أما الثانوي أقل شيوعا وبيكون بسبب أمراض باطنية مثل السكري، باركنسون، الحمل، السمنة، وغيرها.
سناك سوري-استشارات طبية
التعرق بالعادة بيصير بحالات معينة مثل الحر أو المواقف الشديدة نفسياً، أنا بحالة فرط التعرق الراحي الأخمصي، التعرق على طول ماشي. ايدين ورجلين وابطين ووجه مليانين عرق دون سبب واضح.
بيصيب هالمرض نسبة ٢ لـ٣ بالمية من الناس، وبسبب مشاكل مهمة عندن، مشاكل اجتماعية، بتصير المصافحة مزعجة أو محرجة. ولما يشتغل المريض أو المريضة بالورقيات رح يكون التعرق مزعج ومعيق للعمل.
الحل بالبداية، انو نشوف دكتور جلدية لنقدر نعرف اذا ثانوي، يعني الو سبب مرضي داخلي، أو هوي أولي (أغلب الأسباب وراثية)، في حال كان ثانوي، بيكون الحل هو علاج السبب المستبطن.
أما في حال كان أولي، في مجموعة من العلاجات، ممكن الطبيب يبدأ بمضادات التعرق يلي بتحتوي على رباعي كلوريد الألمنيوم. وفي علاج جراحي بتخريب الغدد العرقية، وعلاج بقطع العصب الودي المسؤول عن عملية التعرق.
بالحقيقة، العلاج الأمثل والمفضل هو البوتوكس، يلي عم يعطي نتائج ممتازة، ولكن يُعاب عليه انو فعاليتو قصيرة الأمد نوعاً ما، ممكن يضل ٦ أشهر وممكن اكتر، حسب كل حالة وحسب المريض.
ممكن يلجأ الطبيب ببعض الحالات لوصف مضادات الاكتئاب، لأنو القلق بيفاقم فرط التعرق، وينصح المرضى بضرورة تبديل الجوارب بشكل يومي. والاستحمام بشكل يومي مع التجفيف الكامل، والمشي حافيا قدر الإمكان، وممارسة التأمل وتمارين الاسترخاء.
