حوار محلي بامتياز .. بدل ما تحكو ع المسؤولين احكو ع بعض!
![](https://snacksyrian.com/wp-content/uploads/2019/12/resized_MBC1-Syrian-Drama-Al-Arrab-2-Mona-Wassef-and-Hatem-Ali-2.jpg)
حوار واقعي لشخصيات غير واقعية
سناك سوري _ محمد العمر
تدور أحداث هذا الحوار في بقعة ما من الأرض ولا ينبغي ذكر اسمها لأسباب تتعلق بخصوصية الشخصيات الواردة فيه.
_ انت بدك تضل طايش هيك ومتهور؟
+ أنا؟ خير ليش بقا بشو شفتني طايش ومتهور؟
_ هدول القصص واللعي تبع الفايسبوك ما بدك تبطلن؟ يعني ما رح تتربى ليشحطوك؟
+ليش ليشحطوني؟ عم احكي شي غلط؟
_ ما القصة غلط ولا صح القصة عن ميييين عم تحكي
+ لأ يا ستي ما مهم عن مين عم احكي المهم شو عم يعمل هاللي عم احكي عليه
_ بالله شو؟ وبتقوم حضرتك بتكتب ع الفايسبوك بتصلح الكون؟
+أضعف الإيمان
_ لك لأيمتى بدي ضل انصحك بعد عن هالقصص
+طيب دخلك عن شو بدك احكي ؟ ان حكيت عن الدين بيكفروك حكيت عن المجتمع بيعيروك حكيت عن الفن بينقدوك حكيت عن البلد بيخووووو … بيخوفوك يعني.
_ أي فما لاقيت أحسن من الحكي عن المسؤولين؟
+ عن مين بدنا نحكي طيب
_ احكو ع بعض
+كيف؟ ما فهمت
_ اسماع مني احكو ع بعض أسهل وأضمن يعني مثلاً شفتلي جارنا أبو محمود كيف كان عم يصرخ ع مرتو امبارح مشان الملح اللي بالطبخة ولا بنت أبو خالد كيف شافوها نازلة من سيارة شب ع أول الحارة ولا ابن أبو وليد كيف رسب بالبكالوريا ولا ولا في ألف قصة يا رجل
+ يعني بدك ياني شوف كل غلطة أفظع من التانية واسكت؟ ما بيكفي كل ما حكينا مع حدا بيقلك اعرف حالك مع مين عم تحكي
_ وك افهمني بالهونولولو ما بيكفي تعرف حالك “مع” مين عم تحكي لازم كمان تدير بالك وتعرف “عن” مين عم تحكي.. شو فهمنا؟
+ دخلك بالله شافوها لبنت أبو خالد نازلة من السيارة؟