أنطوانيت نجيب ترد على إسماعيل تمر: مين أنت حتى تقيمني؟
تمر: لن أتراجع عمّا قلته عن انطوانيت نجيب ولكن التسجيل مفبرك
سناك سوري – متابعات
ردت الفنانة “انطوانيت نجيب” على التصريحات التي قالها مغني الراب “إسماعيل تمر” بحقها، معربةً عن استغرابها من كلامه لاسيما أنه تضمن شتائم وكلمات مهينة، بعد انتشار مقابلة قديمة لها انتقدت خلالها خروج السوريين من بلدهم.
وقالت “نجيب” لإذاعة “شام اف ام” المحلية: أن «الكلام عن اللاجئين السوريين فُهم بطريقة خاطئة.. هذا اللقاء عملتو من سنين، وأنا مو ضد الناس اللي طلعت من “سوريا” بسبب الظروف، أنا كنت بتمنى مايطلعو من البلد لأنو هي بلدنا شو ما صار، ع الأقل ما منشحد من حدا، بيبقى راسنا مرفوع، مابدي ياكم تطلعو وتتشتتو ويقولو عم تاخدو رزقة غيركم لأنو رزقتنا ببلدنا».
اقرأ أيضاً: لأسباب غير معروفة.. قناة الجديد تعيد نشر لقاء مع أنطوانيت نجيب
وأضافت “انطوانيت نجيب” «أنا عندي اخواتي بإسبانيا وأميركا والسويد عائلتي برا البلد من 50 سنة كان فيني اطلع من سوريا بس ما طلعت» مشيرةً إلى أن اللقاء خضع لعملية مونتاج فسبب سوء فهم
أما عن “اسماعيل تمر” قالت “نجيب” «أنا مابعرف هاد الشب ليش عم يتقصدني إلي أنا بالذات انو أنا قايلة كلام مو منيح .. عيب أنا بهاد العمر يحكي معي بهاد الأسلوب».
خلال اللقاء، عُرض جزء من رسالة قيل أنها من الفنان “اسماعيل تمر” وصلت منه إلى موبايل “نجيب” جاء فيها «انت ست عمرك سبعين سنة يعني تحنيط هاد انت هربانة منو .. بتمنى تحترمي حالك وضلي ست مقدرة يا حجة انطوانيت».
سبق ذلك أن نشر “تمر” تعليقاً على “فيسبوك”، قال فيه: «أقل ما يقال بحقك بعد هذا الكلام إنك (مخرفة)، وإذا عم تحكي عن الخونة، أنا بعتبرك بعد هالتصريح عملتي أكبر خيانة بحق كل إنسان سوري معتر خارج سوريا.. الخيانة بلشت من عندك أعتقد صار الوقت إنه تقعدي ببيتك وما عاد تطلعي على الشاشة نهائياً، لأنك سودتي وجهنا».
وتابعت “نجيب” «كتير زعلت لما سمعت هاد الحكي وأنا بعرف انو السوريين بحبوني إلي .. زعلت بعد هالعمر وكل هالتضحيات اللي قدمتها بكل عمل اشتغلتو من الستينات لهلأ أنا بعمري ما أسأت لسوريا، هلأ بدي سيء بآخر عمري ويحكي عني شب مابعرفو ولا بيعرفني، أنا بقول عيب التشهير..غلط الشي اللي عملو “اسماعيل”.. مين انت حتى تقيمني ؟».
اقرأ أيضاً: سامر المصري .. من الشاغور إلى هوليوود رحلة الصعود إلى النجومية
من جهته، نفى “إسماعيل تمر” لـ”شام اف ام” أن يكون له أي علاقة بالرسالة الصوتية التي وصلت إلى هاتف “نجيب” قائلاً: «إذا دققت بالصوت رح تعرف انو مو أنا»، مضيفاً «أنا أعيش في اسطنبول ولدي رقم هاتف واحد فقط.. وأنا أبحث عن رقم الشخص الذي وصلت منه رسالة باسمي إلى هاتف نجيب» لكنه أكّد في المقابل أنه لن يتراجع عمّا قاله عنها.
وتابع “تمر” قائلاً «أنا علقت عالفيس متلي متل كل السوريين اللي زعجتهم نجيب لأنو هي بالنهاية غلطت، بغض النظر عن عمرها وقيمتها الفنية وأنا ماعندي مشكلة معها لأنو بحبها من أيام مسلسل “الفصول الأربعة” لاهي مضايقتني كسوري ولا مضايقتني بفني».
وأضاف أن «السوريين خارج البلاد تعرضوا لكل أنواع العذاب وكل سوري منهم إلو مشاكلو وهمومو، الفكرة انو كنتي عم تزاودي علينا وتقولي انو هربنا وانت بتحبي سوريا ونحن لأ.. ومافي حدا بيقدر ياخد رزقة».
خلال الاتصال الهاتفي، قال “تمر” «نحن السوريين برا البلد اليوم عم نتعب .. عم نطلع حتى نرفع اسم سوريا بأي طريقة كانت بالتجارة أو بالفن وبكل المجالات مشان نبعد عن الناس فكرة لاجئ سوري نحن برا سوريا عم نعاني من التهم اللي لصقوها فينا من 10 سنين لهيك صار همنا الوحيد نطلع باسم سوريا بشكل لذيذ»، معتبراً أن «هدف نشر لقاء “نجيب بعد 4 سنوات هدفه تشويه سمعة السوريين وإحداث فتنة».
يأتي ذلك بعد أن نشرت قناة “الجديد” منذ أيام مقابلة قديمة مع “انطوانيت نجيب” تحدثت فيها عن السوريين في لبنان وأنهم يأخذون رزقة اللبناني منه، وأنها لاتفتخر بكونها عربية وتحمل هوية وجواز سفر عربي، الأمر الذي أثار غضب السوريين عبر مواقع التواصل.
اقرأ أيضاً: فازت على كندا حنا وورد الخال.. تاج حيدر عانت من النمطية
