بلا طول سيرة هذا يا سادة يا كرام “اتفركشت” بإعلان عالفيس لصفحة “تياب وكنادر”، بإعلان عارض بوط رياضي ما اشبو شي من ناحية الشكل. للأمانة هو حلو ما حكينا شي. وللأمانة أكثر ما لفتني فيه هو تواجد نمر كبيرة تصل إلى 42 ومحسوبتكم قياس رجلها متل خيبتها بهالبلد كبير شوي.
سناك سوري-وفاء محمد
كل الموضوع ما بيكلف غير نقطة وحدة، لا تفهمونا غلط نقطة لنعرف السعر مو لناخد “البوط”. وباعتبار حبر الموبايل مجاني “سفقت هديك النقطة”. قامت سفقتني رسالة السعر التي تقول: “بس بـ338 ألف ليرة قابلة للزيادة والنقصان”. يا لطيف، يا لطيف تلطف فينا يارب.
للحظة وحدة حسيت حالي “إن دوباي”، وراتبي هالقد قدو، ما بعرف صاحبة هالصفحة من وين جايبة كل هالثقة لتعرض بوط بنص سوريا بسعر يعني إذا شد حالو شوي بيوصل للنص مليون.
ما لكم عليي يمين اتذكرت هديك الأيام، الأيام الخوالي قبل نحو سنتين، لما كان راتبي الحكومي يساوي صرماية كاملة، لك حالياً حتى نص صرماية ما بقا يشتريلي، إيه “سقالله”. بس ليكو وكرمال “الحلال والحرام” بمحلات الأحذية ممكن تلاقوا راتبكم يشتري “صرماية” كاملة إن كان قياس الرجل أقل من 40.
أما بالحكي عن أسعار الجواكيت الشتوية، يا لطيف تلطف بعبادك. هديك جلطة تانية قصدي سيرة تانية لا إلكم ولا إلي فيها. وبمجرد ما تشوفوا الأسعار يلي من نص مليون وطالع، رح تشهقوا هديك الشهقة. شي بيشبه شهقة الحياة الأولى.
وبناء عليه ولك “سيدتي” بالمرة الجاية وقت يقلك “تعي دفيكي”. روحي لا تنتظري عالقليلة دفا ببلاش.
اقرأ أيضاً: أسعار الألبسة الشتوية ترتفع 3 أضعاف.. قرارات الحكومة بتدفي أكتر!
