إعلان حماية المستهلك في “حمص” عن الأسعار.. الله العليم مراقبي التموين ما عميمروا بشوارع المحلات المخالفة
سناك سوري – حسان ابراهيم
في إطار الفزعة الوطنية لوزارة التجارة الداخلية وحماية (المستهلك) وبعد ما صار في خطوط سخنة وباردة، وكمان رقم واتس آب نتيجة التطور الدراماتيكي في نهج عملها، قامت مديريتها في ‘‘حمص’’ بالإعلان عن جدول التسعيرة الشامل لأجود أنواع السلع والمواد الغذائية في المحافظة (ليش في سلع بجودة وسلع بلا جودة)؟؟؟.
بلا طول سيرة .. الجدول مؤلف من ثمان صفحات وقياس A4 عالأغلب، ويوضع في التنفيذ اعتباراً من تاريخ 25 الشهر الحالي (يعني اليوم)، وويلٌ لمن تسول له نفسه من الباعة الصغار وتجار الجملة عدم التقيد به (هاد الحكي من بنات أفكاري) لأن الخطوط عم تحمى شوي شوي، وناطرة اتصال من الأخ المواطن الذي يشعر بالغبن من جراء أية مخالفة تقع عليه (ضل شي وما وقع عليه يا حسرة)؟!؟!.
أكثر المستفيدين من نشر هالأسعار المظبوطة هم جماعة الكاس والمازة، لأنو كانوا مغشوشين من قبل ويدفعوا زيادة وهني مو دريانين (يلي بدو يشرب ما بيعد قداح)، المهم بأنه تم تحديد سعر المشروبات الكحولية المنتجة من قبل شركتي كحول ‘‘حمص –السويداء’’ فقط، وباقي المعامل تصطفل تحط التسعيرة يلي بتناسبها، وسعر البزورات تحدد كذلك للنقرشة، كما تمَّ تحديد سعر الطن الواحد من مادة الكحول الإيتيلي بنوعيه الطبي والصناعي (شايفين قديش الاهتمام واضح بمتطلبات المواطنين)!!!!.
كمان ما نسيت المديرية في جدولها أنو تحط أسعار الفروج المشوي والبروسلي (على قولة جودي أبو خميس) وحددت سعر كل نوع، وما نسيت سندويشة الشاورما والبسطرما، بس نسيت أنو أسعار الفروج كل يوم بوادي شكل، وأنو كل مطعم حاطط شقفة كرتونة وعليها أسعار عروضه يلي بتزيد مئات الليرات عن التسعيرة المحددة، والدوريات التي تم نشرها في المدينة بحسب زعم المديرية بسهولة تستطيع قفش هالمخالفات إذا بدها طبعاً (بس المشكلة إنها ما مرت من نفس الشارع تبع المحل).
أسعار المياه المعدنية حكاية تانية، المواطن صرلو سنتين وثلاثة عم يشتري قنينة نص لتر بمية ليرة وهي طلع سعرا 68 ليرة (حتى العطشان مو نسيانين حقوقه)، بس في سؤال بيبقى محير (الأخ المواطن) بعد ما يقرأ هالجدول (أنا وين من كل هالحكي) نسيتوا تحطولي سعر المتة والسردين والكتشب والأندومي للولاد والزيت والسمنة والرز والبرغل والشاي والمنظفات والمحارم وأنتو أكبر قدر (الفوط)، ولا تنسوا الملابس والأحذية دخيل عينكن لأنو أسعارها واوا بالواجهات (جاكيت سعرا 42000 وأنا بردان)!!!!!!.
الظاهر القصة بدها للتواصل خط ثلاثة فاز بدل الساخن .. وقناة تلغرام !!.
اقرأ أيضاً: انزول جيب طلب وعبيه.. (ولا تنسَ تخلي طوابع بجيبتك تحسباً يا مواطن)
