كيف نتجنب التهاب الجريبات الشعرية؟
التهاب الجريبات الشعرية على بساطته قد يكون خطيراً في هذه الحالة
![](https://snacksyrian.com/wp-content/uploads/2022/12/التهاب-الجريبات-الشعرية-انترنت.jpg)
يعتبر التهاب الجريبات الشعرية مرض جلدي شائع ينطوي على التهاب بصيلات الشعر. عادة ما يكون بسبب عدوى، يعني جرثومة بتفوت على بصيلة الشعرة وبتعمل التهاب، وينتج عنه ظهور بقع أو بثور متهيجة.
سناك سوري-استشارات طبية
التهاب الجريبات بيصيب المناطق المشعرة في الجسم غالبًا الذراعين والساقين والرأس والوجه. تُظهر الحالة نتوءات صغيرة متغيرة اللون قد يكون لها طرف أبيض مملوء بالصديد أو القيح.
في معظم الحالات، يعد التهاب الجريبات حالة غير خطيرة (ما في شي بيخوف). ومع ذلك، يمكن أن يتطور إلى مرض أكثر خطورة لدى الأشخاص الذين يعانون من ضعف في جهاز المناعة. أو عم يتناولوا مثبطات مناعة متل مرضى داء كرون أو مرضى السكري.
في خبر حلو بهالخصوص إنو بمعظم الحالات، يختفي التهاب الجريبات من تلقاء نفسه (لحالو وبالو)، ولكن يُفترض يتعالج بالمعقمات ومراهم الصادات. وببعض الحالات صادات حيوية فموية، وذلك حسب تقدير الطبيب.
ممكن يكون السبب هو تقنيات الحلاقة غير الصحيحة مثل حلاقة الذقن عند الشباب الذكور، لهيك يُفضل يكون اتجاه الحلاقة مع اتجاه الشعر (يلي ما بيجي معك، تعا معو). يعني غالباً من فوق لتحت وليس العكس (المقاومة بلاها)، وعند الصبايا يلي بيستخدمو الشفرة بالحلاقة كمان يفضل نستخدم التكنيك نفسه. مع التنويه بضرورة يكون في خصوصية مطلقة باستخدام الشفرة، ويُفضل نخبيها بمكان بعيد عن المتناول (تفادياً لإنو يصير خربطة و يستخدمها شخص آخر بالخطأ).
وكمان لازم نعقم الشفرة بالكحول قبل استخدامها ونغسلها جيداً بعد الانتهاء، وضروري نبخ كحول مكان الحلاقة.
عند الصبايا يلي بيلبسوا بناطلين ضيقة كتير، ممكن يصير عندن التهاب جريبات شعرية. بسبب الضغط المستمر ممكن الشعر تغير طريقها وترجع تلف وتفوت بالجلد وتعمل والتهاب، وخصوصاً إذا كان الشعر محلوق بالشفرة.