إيطاليا تعطي “اسماعيل” إذن سفر لدخول أراضيها… و”الحكومة السورية” تمنعه بقرار مفاجئ
إذن السفر يمنع سوريا من المشاركة في مهرجان سينمائي إيطالي
سناك سوري – متابعات
قال الكاتب والصحفي “رامي كوسا” إن الفنان “سامر اسماعيل” منع من السفر إلى إيطاليا لتمثيل السينما السورية في مهرجان “فينيس” لأنه لا يحمل إذن سفر من شعب التجنيد.
جاء ذلك على إثر القرار المفاجئ الذي تم تطبيقه بشكل مفاجئ صباح اليوم وهو يقتضي بمنع سفر اي شخص بين /17-42/ لم يحصل على إذن سفر من شعبة التجنيد، وهو ما أربك الشبان المسافرين وضيع عليهم حجوزات سفر وطيران وفرص كالتي خسرها “سامر” وخسرتها سوريا.
“كوسا” كتب منشوراً على صفحته في فيس بوك يستعرض فيها الحادثة بكثير من الأسف والحزن على الفرصة التي ضاعت على سوريا فقط لأن من أصدر القرار لم يكلف نفسه الإعلان عنه بشكل رسمي قبل أيام ونشره على نطاق واسع حتى يتسنى للمسافرين الاطلاع عليه وتطبيق مضمونه.
وهذا ماكتبه “كوسا”:
بالوقت اللي واحد من أهم مهرجانات السينما بالعالم، مهرجان فينيس (ايطاليا)، عم يحتفي بالسينما السورية ويستصدر فيزا لصناع فيلم “يوم أضعت ظلّي” للمخرجة سؤدد كعدان، ويتجاوز كل الممنوعات يلي بتتعلق بسفر السوريين لأوروبا، منجي نحنا ومنحاصر شبابنا ومنحرمهن فرصة يمثلو بلدهن برا ويقولو للدنيا انو سوريا فيها فن وفكر وحضارة مو بس سلاح ودم..
قبل شوي انمنع الممثل والصديق سامر اسماعيل من مغادرة الاراضي السورية لأنو مو جايب اذن سفر!!!
القرار صدر مبارح ليلاً، ومو كل الناس لحقت تتبلغ فيه، سامر وصل عالحدود ليتفاجأ بأنو ممنوع يغادر البلد بدون اشعار من شعبة التجنيد، وقالولو لف ورجاع وراحت عليه الطيارة وخسر فرصة التواجد بالمهرجان بعد كل الشقى والتعب بالتصوير والاجراءات اللازمة لاستصدار فيزا من السفارة الايطالية..
أقسم بالله العظيم أنا كنت قول أنو لو شو ما صار بالبلد ما رح يخطرلي هاجر. دايما رح لاقي اسباب لحبها واتعلق فيها، حتى لو الحرب عملتها طحين بدي ارجعلها.. بس يلي عم يصير مرعب.. مذهل.. كرهتونا بأم سوريا، قدرتو تكونو سيئين وبشعين وبلا احساس بالناس لدرجة كرهتوني برب البلد..
رفقاتي وقرايبني والناس يلي عندي عالصفحة بيعرفو اني قايم نايم بحلف بالشام وبسوريا وبحلم بلحظة الرجعة عليها والاستقرار فيها من بعد دفع البدل، بس من الصبح عم قول انشالله عمرا هالبلد يلي بدي تصبحني بكف وتمسيني بكفّ وتذلني رايح راجع لمجرد انو بدي عيش فيها!!..
لك ليش هيك عم تعملو؟.. نحنا شبابها لهي البلد.. نحنا عمودها.. ليش عم تذلونا هيك؟.. ليش عم تهينونا وترخصو فينا بهالطريقة؟.. ليش عم تتعاملو معنا على اننا برغش ونازلين فينا ملاطشة؟..
بعرف شباب عم يهدرو فتوتهن بشغل ١٦ ساعة ليسندو اهاليهن، عم يشقو ويبقو الدم ليتوازنو بين شغل ودراسة ويعملو مستقبل ماشي حالو، بدل ما تعينوهن عم تشعّلو الارض من تحتهن وتهججوهن وتخلوهن يلعنو جنسيتهن باليوم القصير الف مرة.. لييييش؟
رفقا فينا والله تعبنا… تعبنا تعبنا… التعن ربنا…
بكرا لما الشباب ينفجرو وينفلت الوضع من جديد طلعو قولو مؤامرة كونية وخطة بندر…
ما دخلو بندر عفكرة.. شغل ايدكن.. واذا بدكن تضلو تضغطو بهالطريقة بدو يجي وقت وتشعل البلد باللي فيها…
الك الله يا سامر..
اقرأ أيضاً : قرار “مفاجىء” لشعب التجنيد في سوريا
