الشفاء من السكري يحتاج لأمر واحد فقط
معلومات مفيدة لنتعرف على مرض السكري وكيف ممكن نقدر نأمن عدم الإصابة فيه
الشفاء من السكري بعد أن يتعب البنكرياس ويقل إفراز الإنسولين؟ هل هذا ممكن؟
سناك سوري-استشارات طبية
يمكن مافي مرض منتشر أكتر من مرض السكري، بالنهاية البنكرياس رح يتعب متلو متل أي عضو تاني ورح يقل إفراز الإنسولين. أو خلايا الجسم رح يبطل إلها مروة تستقبلو (تِعِبْتِ منك).
في معلومة كتير خاطئة وشائعة انو أنا بنطر لحتى يصير عندي أعراض لحتى افحص حالي، اذا ماعم بوّل كتير معناتا ماعندي سكري. اذا ما عندي تعب معناتا ماعندي سكري، الفكرة انو مرض السكري بحالات كتيرة مابيعطي أي أعراض. وما بيحس المريض عحالو لبعد ما تصير الاختلاطات.
وشو العمل؟ السكري في الو عوامل خطورة، مثل العمر والوراثة وارتفاع الضغط الشرياني، وارتفاع الشحوم، لهيك في حال عندي عوامل الخطورة هي. مفروض ما انتظر لحتى يصير معي سكري، لازم بلش تحاليل دورية، وتغيير نمط الحياة، بحيث يصير فيه رياضة أكثر وخضار أكثر.
في مرحلة اسمها السكري الوشيك أو ما قبل السكري، غالباً ما بتعطي أعراض وبيكون السكر فيها مرتفع قليلاً، وإذا استمرت لفترة طويلة بتعمل مشاكل متلها متل السكري. وممكن ما تنكشف لبعد عشر سنوات مثلاً، هون بيكون يلي ضرب ضرب ويلي هرب هرب، وكل شي فيه يعملو الطبيب هو التسكيج وليس العلاج.
اقرأ أيضاً: أهم الأسئلة الشائعة حول المينوكسيديل أحد أهم أدوية علاج تساقط الشعر
فيما لو تم الكشف مبكراً ممكن نوصل من خلال الحمية والرياضة لمرحلة الشفاء من السكري بشكل كامل وبيصير بعدا منعمل تحاليل دورية ومنواظب عالرياضة ومننتبه على أكلنا أكتر.
لو تم الكشف مبكراً ممكن نوصل من خلال الحمية والرياضة لمرحلة الشفاء الكامل
الوراثة والجينات هيي العامل الأقوى بالإصابة بالسكري. ولكن هاد أمر مافينا نغيرو. بس فينا نأخرو. وبدل ما ننصاب بالخمسين. مننصاب بالستين أو بالسبعين. هاد بحد ذاتو إنجاز حقيقي. بالعشر سنوات ممكن تصير اختلاطات لا يمكن التراجع عنها.
كتير مرضى بيكتفو بتحليل سكر الدم. وهاد غلط نوعاً ما. يجب إجراء فحص بول وراسب بشكل متكرر لأنو السكري بيأثر على الكلية. وكمان مراجعات متكررة للعيادة العينية. مو شرط يكون عنا غباشة لحتى نراجع طبيب العينية.
تذكر انو السكري بيأثر عالقرنية الشفافة للعين وعالعدسة أو الجسم البلوري. وبيضرب كمان الأوعية الدموية الصغيرة يلي بالشبكية. لهيك بسبب العلاقة الحميمية بين السكري والعين. تعتبر مراجعة العيادة العينية بشكل منتظم فرض على كل مريض سكري.
