هل تفيد ممارسة العادة السرية في الوقاية من الدوالي؟

دوالي الحبل المنوي هيي مشكلة كتيييير شائعة عند الشباب، يمكن مافي ذكر إلا ومر فيها بمرحلة من حياتو، منهم راحت لوحدها بدون أي شي، ومنهم احتاجوا لعمل جراحي.

سناك سوري – استشارات طبية

دوالي الحبل المنوي هيي توسعات بالاوردة يلي بتنزح الدم من الصفن والخصية، هالتوسعات بتحصل نتيجة ركودة أو نتيجة تأهب جيني.

الخصيتان متل ما منعرف، مسؤوليتن إنتاج النطاف، وهي النطفة الحبابة ما بتحب الشوب والحرارة العالية، لهيك قررت تهاجر لبرا (حتى الخصيتين!)، مشان تأمن درجة حرارة مناسبة (بتحترم وجودها وحياتها لحتى تأمن مستقبلها). واستقرت ضمن كيس الصفن، يلي درجة حرارتو أقل بدرجتين من درجة حرارة الجسم الطبيعية.

لكن ما يحصل في دوالي الحبل المنوي، هو احتقان الدم ضمن كيس الصفن، وبالتالي ارتفاع درجة الحرارة ضمن الصفن (أحياناً الغربة كربة). وبالتالي بيأثر على إنتاج النطاف، وبالتالي العقم..

طبعاً غالب الشكايات عند العازبين بتكون ألم على الجهد، مع وجود توسعات وريدية بكيس الصفن، وعند الذكور المتزوجين حديثاً. بسبب انو صرلو فترة متزوج وماعم يصير فيه حمل، وبأغلب الحالات مابيصير عند المتزوجين منذ زمن، طبعاً هاد بيرجع لدور العلاقة الجنسية المنتظمة بمنع الركودة الدموية.

تحليل السائل المنوي ضروري، وهوي يلي بيحدد طبيعة العلاج، جراحي أو محافظ.

للوقاية من دوالي الحبل المنوي، الرياضة بتساعد جدا بتنشيط الدورة الدموية ومنع الركودة، وتجنب الوقوف المديد أو القعدة الطويلة. وممكن بنهاية الحمام غسل المنطقة التناسلية بمياه باردة قليلاً، وفي نقطة هامة هي تفريغ السائل المنوي بانتظام دون إفراط عبر العادة السرية، ومن الأفضل سؤال اختصاصي عن الموضوع، (الزايد أخو الناقص).

أعد المحتوى الدكتور “غدير برهوم” – موقع سناك سوري

اقرأ أيضاً:أهم النصائح لتخفيف آلام الدورة الشهرية