كيف ممكن أن نساعد الأطفال لتجاوز صدمة وفاة عوائلهم؟
لا يمكن إرجاع الميت لكن ممكن مساعدة الطفل للتعامل مع الحدث
الزلزال خلّف كتير أطفال صارو بدون أهل، هاد شي مؤسف ومحزن، لا يمكن إرجاع الميت، ولكن ممكن نساعد الطفل يتعامل بطريقة أفضل.
سناك سوري-استشارات طبية
أول شي ممكن نستخدم كلمات بسيطة ومفهومة بالنسبة للطفل، نحاول نكون هادئين لما نخبر الطفل بالوفاة. ونستعمل كلمات واضحة ومباشرة مثل “عندي خبر سيء ومحزن، والدتك توفت اليوم”، وبعدها خلينا نتوقف شوي لحتى الطفل يتأمل هي الكلمات ويستوعبها.
كل طفل ممكن يكون الو ردة فعل مختلفة على الفقد، ضروري نستوعبها وما نحاول نكبتها أو نقلو “الرجال ما بتبكي”، وممكن ما يبدي الطفل أي ردة فعل.
ممكن نعانق الطفل أو نحضنو، ونجاوب على أسئلتو بدون كذب، ولا بأس نبكي قدامو ونتفاعل، ونحاول نصيغ مشاعرنا ضمن كلمات. وبعدها نطلب من الطفل يقلنا شو حاسس؟ وبشو عم يشعر.
اقرأ أيضاً: هل من المفيد أن نمنع الحديث عن الزلزال أمام أطفالنا؟
ممكن نقلو كلمات مطمئنة مثل، “أمك كانت كتير حنونة، وكنت انت تحبها وكل الناس بتحبها، واليوم كلنا حزينين عليها”.
خلينا نشجع الطفل على المشاركة بالجنازة وبمراسم الدفن والعزاء، ومهم نشرح للطفل شو رح يصير ونحضرو. ممكن نقلو “رح يكون في ناس كتير تجي تقلك الله يرحمها والعمر إلك” وانت بترد عليهم ” البقية بحياتك أو العمر إلك أو شكراً لتعزيتك”.
ممكن نشرح للطفل عادات الدفن حسب الثقافة أو البيئة يلي عايش فيها، غسيل الميت وصلاة الجنازة وغيرها، هي كلها بتساعد الطفل على تقبل الفقد بوقت أسرع. ممكن بعد الجنازة نشارك معتقدات العائلة حول حياة ما بعد الموت بطريقة مقربة لذهن الطفل، بتحمل كلمات ذات طابع إيجابي.
الفقد سيء، وممكن يترك كتير ندبات، ولكن بهي الطرق ممكن كتير نخفف على الطفل، ونساعدو يكمل حياتو، ويكون عضو فاعل بالمجتمع.
