شو مخبيلكن الفلك هالأسبوع؟ أبراجكم مع سناك سوري

الحمل

حظوظك عالية جداً هالأسبوع متأقلم مع الوضع وأمورك عال العال، بس هذا لا يعني انو مافي منغصات بنوب، يعني لا يخلو الأمر من عركسة هون تأخير هنيك، بس بالمجمل أمورك قياسا بالوضع العام ممتازة، ركزلي على قصة قياسا بالوضع العام، شو هي الحكومة أحسن مننا لتستخدم شماعة الحرب ومايستخدمها الفلكي.

الثور

خليلي مزاجك رايق وحياتك لا لا تفئسنا، هي الغنية خصيصا لالك هالاسبوع، خليك رايق يعني اذا عصبت وشخطت وتذمرت شو رح تستفاد غير سم البدن، طنش تعش تنتعش واضحك قد مابتقدر اضحك، وتعلم شي من قانون الجذب بلك بتجذب الحظ الحلو حاج مفكر حالك منحوس، لك عيني مجرد كونك عمتشم الهوا هذا يعني انو أمورك تمام، إنت عايش بسوريا مو بأوروبا وتعريف الأمور التمام ببلادنا بيختلف عن تعريف الأمور التمام ببلاد الإفرنج.

الجوزاء

وطي صوت الموسيقا شوي، أو استعمل السماعات يعني اذا كنت مرتاح ومبسوط ومشقرق مو بالضرورة ترقص بصوت عالي جرب ارقص بصوت منخفض، مابتعرف انو نحنا عايشين ببلاد بتكره الارتفاع، مثال ارتفاع الأصوات ممنوع، ارتفاع سقف الطلبات ممنوع، ارتفاع الحريات ممنوع، عند هدوك ممنوع صوتك يرتفع ويقول هدول فين شي ايجابي، وعند هدول كمان صوتك ممنوع يرتفع ويقول انو هدوك معن حق، يعني مافي شي مسموح غير ارتفاع الأسعار، مزاج حضرتك اسمو أسعار شي؟.

السرطان

مواليد هالبرج عندن أسبوع للتأمل والتبصر والتفكير العميق، أكيد مانن ناويين يخترعوا الذرة، عندن قضية أعمق بكتير هني عميفكروا كيف رح يمضى اخر أسبوع بهالشهر خصوصاً أنو الجيبة بدأت تصفر صفير عميق سمع صداه في الصين، بتهون وبتمرق شو يعني هي أول مرة بتصير معك، لا تهكلوا للهم خلي معنوياتك عالية والله يخليلك دفتر جودي وسمان الحارة.

الأسد

حاسس كأنو ناقصك شي هالاسبوع عمتدور وتفتش وصرلك يومين على هالحالة، عالأرجح مانك متعود على جية الكهربا 24 على 24 بعد ما التغى التقنين لأسباب مجهولة، ماتخاف بكرة الإرهاب بيضرب شي محطة كهربا وبترجع العتمة يلي فقدتلا حضرتك وعمنفقدلا كلنا، الله يجعل أيامك وأيامنا مليانة كهربا ونضل نشتاق للعتمة، قول امين.

العذراء

عندك أسبوع واو عن جد واو، بيعئد على قولة إخواتنا اللبنانية، بس دير بالك تتعقد، مابينخاف عليك يلي ماعقدتو أزمة وحرب عمرن 7 سنين، مارح يعقدو أسبوع مريح مافيه مشاكل، فلكي سناك بينصحك تخترع شي مشكلة لحتى تضفي جو من الأكشن على أسبوعك، مو معقول يمر بهالسلاسة كلها، حاول اخترعلك شي مشكلة حتى تبعد العين والحسد.

الميزان

أسبوع للمغامرة والقضايا العاطفية، لن يعكر صفوه سوى نق الشريك حبيبة أو حبيب على بدي كذا جبلي كذا، عطيني اهتمام، والي حضرتك خايف منو صار الشريك طلع من بتوع عاوز حب، وحضرة جنابك مالك بقصص الحب والغرام، يالله ولو قضيها حكي غزل واحمود ربك انو الشريك بدو حب واهتمام مابدو مصاري وكاش، مصيبة أهون من مصيبة.

العقرب

لازم تعرف إنو الأحلام مابتطعمي خبز، أصلا الحكومة أفيدلك من الأحلام صحي خبز أفران الحكومة سيء وطالعة ريحتو بس عالقليلة موجود ومتاح، أما الأحلام ياصديقي بتخلي واقعك أسود خصوصا لما تشطح فيها كتير وتوصل لقصر الملك وإنت عايش ببيوت الرعية، خليك عالأرض وإذا حابب تعمل شي قوم اشتغلوا بإيدك واتروك الأحلام للمراهقين والمراهقات.

القوس

سهامك رح تعملك شوية مشاكل هالأسبوع، لأنك قررت تنتقد السلطة، يعني إذا كنت مؤيد فالحكومة رح تمسك بزمارة رقبتك واذا كنت معارض فسيف المعارضة رح يحذها، اسمع مني ضبوط سهامك ووجها نحو أهداف واضحة تقدر من خلالها تعمل شي لحالك لأن الحكي مابجيب نتيجة فليش تروح فرق عملة.

الجدي

الجدي المشهور بوجهو الناشف مقضاها ضحك وفقش هالاسبوع مو من عوايدك يعني، يالله سيدي منيح الي التقى حدا مبسوط في ظل مانعانيه من حرب وغلاء وديقة حال وهم وغم وكلام مالو طعمة، بالله عليك بعد ماذكرناك بكل هالبلاوي لسه جاي عبالك تضحك؟، خلص ولو افردها وارجع اضحك أصلا أحيانا الضحك بيعدي فبلك بتكسب ثواب بكل الناس الي حواليك وبتخلين يضحكو.

الدلو

اذا بنلف القطب المتجمد الشمالي ومتلو القطب المتجمد الجنوبي مارح نلاقي شي بهالحياة أبرد من مواليد هالبرج، الكون بينفجر حولن وهني ماسكين كاسة العصير وعميشربوها بكل رواق، روح الله يديم عليك هالرواق، فلكي سناك بينصحك تبطل غرور شوي، وتلتفت للناس الي حواليك اعطيهن شوية اهتمام منشان لما تحتاجن مايقولوا عنك مصلحجي.

الحوت

طالع بالع فايت بالع، مابتشبع بنوب، الناس بالعة الموس عالحدين وانت بالع الناس كلها، لك مين إنت؟، مسؤول معارض ولا مسؤول موالي؟، وعلى سيرة معارض وموالي بالله مامليتو من قتال بعض، صالحو حالكن وخلصونا الناس بدا تعيش ماشبعتو من الحرب طيلة هالسبع سنين، ولا صح انتو شو هاممكن عايشين ومرتاحين لا الغلا مر من جيبتكن، ولا الموت فات عبيوتكن، بالعموم فلكي سناك بينصحك تخفف بلع شوي لأن ممكن يصيبك عسر هضم حقير بس مو أحقر من أطراف الحرب ببلادنا طمن بالك.