سناك سوري-حظ ونحس وأبراج
الحمل:
ينصحك فلكي سناك إنو ماتخلط بين الحب والعمل وبطل بصبصة عالزميلات أو الزملاء، وأما مهنياً فروح دور على مجالات جديدة ومشاريع تانية حتى تقدر تنافس من خلالها، بس حاذر من التراخيص إذا ماعندك واسطة أو مصاري خرج تبخبخها يمين وشمال الغي الفكرة واستريح.
الثور:
يبشرك فلكي سناك أنك ستتخلص من الضغوط والمسؤوليات يعني كل “مسائيل” هالبرج بالمعارضة والحكومة هني في دائرة الخطر، حاولوا استوعبوا الموضوع وهدو اللعب شوي أحسن ماتروح عليكن بالمرة، يعني الي بيحضن الوطن يطلع لبراتو شوي منشان شوية مكاسب، والي برات الحضن يحاول يدخل شوي لجواتو كمان منشان شوية مكاسب.
الجوزاء:
يبدو أن مواليد برج الجوزاء بغالبيتهم من المسافرين أو اللاجئين أو المدعومين حيث يقول لهم فلكي سناك إنهم بانتظار محطة جديدة ومهمة بالعمل وسيحققون خلالها الكثير، والكثير بسوريا ما بيجي من فراغ وشوية جد واجتهاد.
السرطان:
هدي وروق الفرج عضة كوساية وبيطرق على بابك، الفيزا جاي ورح ترتاح من الحكومة والمعارضة وفلكي سناك بدو البشارة فيزا ليسافر معك ويطفش، صحياً خفف شوية شغل ومو ضروري تشتغل بأربع خمس محلات لتأمن مصروف البيت افتح تمك للحكومة والمعارضة بيطعموك هوا.
الأسد:
بطل لهوطة أكل يعني إذا الله من عليك وأكرمك لتكون عضو بلجنة مشتريات ليس من الضروري أن تبتلع كل شيء أمامك، ولا قلك لا تقصر قد مابتقدر تعبي عبي جايتنا أيام رح تاخد فيهن المعارضة الشي القليل الي تركتلنا إياه الحكومة، صحتين على قلبك.
العذراء:
المود مضروب عالآخر اليوم، بعد عن المشاكل قد مابتقدر، وإذا لزقت فيك خاويها وارتاح، وممكن ترشيها بشي هدية بسيطة بحسب مدخولاتك، ملاحظة: المشاكل هي مديرك، والهدية ممكن تكون كروز دخان من النوع الي بيحبو وقامت وخلصت.
الميزان:
ياحلو يامدلل ياميزان، اليوم بريقك رح يسرق عيون الكل، ويمهد الطريق إلك أمام كل رغباتك، يعني ياصديقتي اتمكيجي وتأنقي ونزلي دوريلك على شي وظيفة عند شي مدير محترم، حاج باركة بالبيت على فيس وواتس.
العقرب:
عندك يوم مرعب على صعيد الاستثمارات، إذا كنت معارض أو موالي استثمر بالأحداث، ما حأشرحلك أكتر إنت قدها يا مسيح الجوخ.
القوس:
عالطريق جاييك خبر ليس بجميل، متلك متل عامة هالشعب، بس إنت ماشالله عليك تأقلمت رح تسمعو وتضحك حتى صوت ضحكتك يصير أقوى من صوت مدفع الحرب الي هي كمان متل عامة هالشعب خلصت وفشلت.
الجدي:
عندك يوم ضاغط جداً وبتعرفوا انتو حالياً الضغط هو الشي الوحيد المتوزع بالتساوي على المعارضين والموالين من عامة الشعب حصراً، مو متل الي فوق من الطرفين عايشين وعمياكلو كافيار عحسابي وحسابك.
الدلو:
وصلنالك يادلو خيو بطل قصص العميل المزدوج مرة هون ومرة هنيك، حدد موقفك وبيكفي تلون، ماعد عرفنا حضرتك محسوب على مين، معارض ولا موالي ولا منتفع من الاثنين، جاييتك مرحلة صعبة بتطلب منك موقف واضح أحسن ماتخسر وتصير محسوب على عامة الشعب.
الحوت:
كبر راسك لسه بدو يجيب آخرتك، ابعود عن تكبير الراس وميل شوي مع المدير حتى ماتخسر فرصة مابتتعوض، لك حبيبي الدنيا هيك ماشية صحصح معنا شوي إنت سوري مو أوروبي، برضا إمك عليك ميل شوي وخليك رشيق.
