إقرأ أيضاالرئيسيةفن

الحمل مزاجه عالي والأسد محسود ….. أبراجكم غير مع فلكي سناك؟

سناك سوري-حظ ونحس وأبراج

الحمل

أنت مقبل على شهر إيجابي لن ينجح حتى ألد اعدائك بالتأثير على مزاجيتك العالية، فلكي سناك بينصحك بعدم الغرور هالفترة خصوصا بالأسبوع الأول من الشهر لما تروح تستلم الراتب، تذكر إنو شغلة عشرة أيام إذا مو أقل رح تتنفس إنت والجيبة سوا، حبيبي شهرك ايجابي يعني شهر بتنجح تتأقلم فيه مع وضعك إن شالله راح ذهنك لمكاسب مالية مثلاً؟، الله يخليلنا الحكومة ماسمعتا وهي عمتأكدلك إنو مافي زودة.

الثور

الأسبوع الأول رح يمر وانت ماسك هديك الوردة تبع بتحبني مابتحبني، ورح تطلع مرة بتحبك ومرة لا، بدك تروق وتطول بالك، الحياة مانها حب بحب، الحياة عبارة عن كومة شغلات بتفوت بعضا لتنتج كائن اسمو مواطن سوري أثبتت التجارب إنو متل القط بسبع رواح، الحكومة للأسف عرفت هالشي وعمتمتحنوا لتأكد النتيجة بمساعدة المعارضة.

الجوزاء

لا تيأس، كافح، قاوم، بادر، الحياة بدها شوية قوة، وين راحت قوتك كلها، معقول الحرب استنفدتا؟، طول بالك لسه القادم اعظم، إن شالله صدقتن وقت قالولك خلصت وفشلت ولا الثورة مستمرة؟، يالله قوم اهجوم على أسبوعك وباغتوا وقول للحياة ها أنا ذا قادم لأعارك، قدرنا نعارك، مرة المعارضة، مرة الحكومة، مرة الغلا، مرة العمل، هذا هو معترك الحياة الي كانوا يخبروك عنو من قبل وقت يقلولك استعد للدخول في معترك الحياة، فلكي سناك بيباركلك بالمعترك عسى أن تمتلك الحياة قريباً.

السرطان

الأسبوع الأول من الشهر سوف يمر متل كل يوم قبلو، لا تتفائل ولا تتشائم اعمول بالكلمة السورية الي بتقول، متشائل، خير الأمور أوسطها، يالله قوم اربط وسطك واعملك وصلة أصلا الرقص هو الحل لكل المشاكل، بس ماتشط كتير في مشاكل تانية بدها رقص من نوع تاني، وإنت سيد العارفين.

الأسد

عندك أسبوع لا ممتع ولا ممل، لاحلو ولا بشع، قرفان من كل شي ومانك حاسس بشي، متمسح عالآخر لدرجة انو كل الي حواليك عميحسدوك، لك نحنا شعب منحسد المتمسحين كتير لانن بيضلو مرتاحين، روح الله يهنيك ويجيرك من شي عين تقلبك نمر بعد أيام التمسحة المريحة، نصيحة فلكي سناك لالك لا تعتمد التمسحة دائما واعرف كيف تستخدمها لتحقق أهدافك في متابعة الحياة التي كتبت علينا.

العذراء

صديقي العذراء عليك أن تعلم أن أي نتيجة نحصل عليها بخياراتنا وليس مقدرتنا، وبعيد عن الفلسفة وبلغة سورية بحتة، تعلم كيف تختار وتدعم خيارك بالقدرة على تحقيقه مو تروح تحكي عن مقدرتك اللامتناهية بالوقت الي خياراتك فيه فايتة بستمية حيط، ولا تجي تقلي متل رئيس الحكومة الحق عالحرب، الحرب بتعيقنا شوي بس بتعلمنا كتير.

الميزان

متوتر وقلقان ومترقب لشي ماعميعرف شو هو، بسيطة عزيزي الميزان زين الأمور بعقلك الكبير واتأكد إنو الشي الي ناطرو مابيجي لعندك إنت لازم تروح تمسكو من إدنو وتتكلبش فيه ليجي معك، تذكر دائما إنك سوري والسوري كل حياتو مختلفة، مثلاً هي بدرعا زانوها وطلع بدهم يدفعوا مليارين لترميم الجامع العمري.

العقرب

والله أيامك ياعم، العقرب مو عاطي فرحتو لحدا، الموظف عميفرك إيديه بانتظار الراتب، والعشقان عميفرك ايديه بانتظار الراندفو، والمعارض عميبحث بشكل جدي العودة لأرض الوطن، والموالي قرر يتصالح مع الحكومة ويستسلك باختصار العقرب مامستعد يخلي أي طرف يعكر صفو حياتو أخد قرار بالسعادة، الف مبروك والله انك فهمان بس انتبه من شي قذيفة لأن عنا بسوريا بس حدا يكون فرحان بيقولولو الله يجيرك من ساعة الغفلة.

القوس

صديقي القوس الي راح مابيرجع، بيتك الي تهدم، رفيقك الي سافر وهاجر، حبيبتك الي تزوجت، هدول كلن شغلات أكس عليهن وافتح صفحة جديدة، بيضا وعبيها أصلا مارح تطول لتتعبى بغمرة الاحداث والمتغيرات الي عمنعيشها فلكي سناك بينصحك تركز على الدعاء على الحكومة والمعارضة بشكل أوسع وصب جام غضبك عليهما، فهما السبب في كل ماحدث وسيحدث في حياتك القادمة واللاحقة.

الجدي

فلكي سناك بيبشرك بربح مادي كبير إذا ماكنت موظف وناطر راتبك، اسحب ورقة يانصيب وانتظر يمكن تربح، يعني بأقل تقدير رح تربح حق الكرت أو نصو المهم إنك رح تربح، لانو كل الطوالع الفلكية وحركة الكواكب بتأكد إنك رح تربح يعني لو في انتخابات مجلس شعب هلا كنت صرت عضو مهم وفاعل ولهيط.

الدلو

قذيفة عاليمين وصاروخ عاليسار والدلو حاطط كرستو بالنص قاعد عميأركل ويشرب متة، هذا هو الدلو الي مابيفرق معو شي بالنسبة الو كل هالدنيا فانية ومانو مضطر يقضيها كره بالمعارضة والحكومة، أصلا في فكرة كتير شاغلتو حاليا، عميسال حالو: وماذا لو كانت هذه الحرب حلبة رقص ونحن أخطأنا استخدام الأدوات، إي والله معك حق مافي فرق بين البارودة والشال الي منربط فيه الخصر، وهزي يانواعم.

الحوت

اسبوع من العمر عايش حياتك ومبسوط الله العليم عمتقضي اجازة بأكتر محل بتحبو، روح ياشيخ حلال عليك، يعني بعد اربع خمس سنين ضروري الواحد ياخد إجازة يقضيها بالمحل الي بيحبو، خمس سنين كافية لتقدر تصمد كم ليرة تروح فيهن اجازة يومين عالبحر بس انتبه على مدخراتك يادوب يكفوك حاول قضيها عالفلافل ولا تاكل غلا وقت تجوع، نحنا بزمن حرب والوضع مابيتحمل بنوب البهورة والبحترة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى