سلنكو يوضح لنا سريعا شو يعني إدارة محلية

هالانتخابات قوية.. قوية كتير يا إلوهي ما أقواها

سناك سوري-رام أسعد

ولأنني من سكان “أم الطنافس الفوقا” فإن موضوع الانتخابات وصلنا متأخر قليلاً وخاصةً أنني لم أر صوراً للمرشحين ولا مضافات ولا مهرجانات خطابة (وحدة من اتنين يا مافي انتخابات يا أم الطنافس مالا علاقة بالموضوع) لذا قررت التوجه سريعاً إلى المثقف الوحيد في ضيعتنا ”سلنكو“ ليشرح لي أهم ما يتعلق معي بهذه الانتخابات مصطحباً معي “قطرميز مكدوس” (مابيرضى يعطيني دقيقة من وقتو من غير مكدوس) فجلسنا سويةً على درج منزله وبدأ حديثنا..

-أستاذ “سلنكو” المحترم: ممكن توضحلنا شو المقصود بالوحدات الإدارية؟

سلنكو: ليك أخوي..سوريا هي بحسب التقسيمات الإدارية عبارة عن 14 محافظة وكل محافظة فيها عدد من المدن، والمدينة هي مراكز المحافظات والمناطق وعدد سكانها بكون أكثر من 50 ألف واح وواحة (أي ذكر وأنثى).

وكل مدينة فيها عدد من البلدات والبلدة هي كل تجمع سكاني عدد سكانه فوق الـ 10 ألاف واح وواحة وأقل من الـ 50 ألف وكل بلدة تتألف من عدد من البلديات، والبلديات هي يلي بيترواح عدد سكانها بين الـ 5 آلاف والـ 10 آلاف واح، يعني الانتخابات يلي رح تصير بعد عدة أيام هي لانتخاب أعضاء مجالس محافظة ومدينة وبلدة وبلدية.

-ايواا.. فهمت عليك فهمت عليك افوكادو العظيم..لكن مافهمت شو وظيفة هالمجالس ولا أخوي؟

-اووووه ولا أخوي يحمو لئلبك على هالسؤال، لو بضل لبكرا عدّلك وظايف ما بخلصلك هني لأن المرسوم 107 الصادر لعام 2011 عطاهن عدد كبير من المهمات منشان تطبيق لامركزية السلطات، وقبل ما تسألني شو يعني لا مركزية السلطات يعني بدل ماتروح للوزارة بالعاصمة لتاخد موافقة بشي بدك تعملو ضمن نطاق بلديتك، بتروح على مجلس بلديتك وهو بيعطيك الموافقة، ومجلس بلديتك ليكو فشخة حجر بـ “تخريمة الفوقا”. فهمت عليي ولا أخوي؟

-فهمت عليك بس ما جاوبتني ولا سليم شو هي وظيفة هالمجالس؟

-موشي مواشي ح جاوبك، وظيفة هذه المجالس بشكل عام ومختصر هي وضع خطط تنموية للانتقال لواقع أفضل خدمياً وثقافياً واجتماعياً ومؤسسياً وتنفيذ المشاريع المتعلقة بالتمية والتخطيط المشترك مع الوحدات الإدراية المجاورة (يعين مع بلديات جيراننا).

وكمان دورها تزيد المصاري يلي بتجي عالبلدية منشان يصير في مصاري كثير ينصرف منها عالموازنة تبع كل سنة.

وهالمجالس فيها تعطي تراخيص مثلاً ليصير في باص نقل داخلي بأم الطنافس الفوقى، وفيها كمان تهتم بالشباب والرياضة (تخيل ولا يعملولنا ملعب بأم الطنافس ويحطو المختار حارس وضل شوط الطابة عليه!!).

آي واذا أعضاء المجلس كانوا شاطرين كمان فيهن يعملولنا مركز خدمة مواطن، يعني محل بتروح عليه بتعمل كل معاملاتك فيه، بدل ماتروح على شي ألف دائرة وتطلع درج وتنزل درج، ولا انت لازم تطلع وتنزل درج لتدوب هالكرش الناتعو ولا أخوي.

آي وكمان بالقانون اتي كمواطن لازم تشارك بالقرار بها المجلس المحلي، يعني يصير إلك رأي، ويشاركك المجلس بصنع القرار، (تخيل ولا اتي إلك رأي!!).

وطبعاً بتختلف حجم المهمات مابين مجلس المحافظة ومجالس المدن والبلدات والبلديات.. شفت شو قوية الإنتخابات الجاية بعد كم يوم!؟

-قوية.. قوية كتير يا إلوهي ما أقواها..صح سلنكو مادام الانتخابات ماصارت ليش كانوا عم يباركو لوليد أخو جودي ابو خميس بالفوز؟

-ما دحشني.. بدك تسأل الرفيق جوهر من مسلسل الخربة أو عمي المختار سليل الإقطاع حياتي اتي.. وهلأ اسمحلي رايح شوف عفوفي..

-طول بالك بس بخصوص الانتخابات..

-عليك وع الانتخابات عندي أمور أهم هلأ يلا قولة جودي أبو خميس.. بالإذن.. بالأنف..بالحنجرة

*هذه المادة أعدت بالتعاون مع حملة#دورك

المقالات المنشورة لا تعبّر بالضرورة عن رأي الموقع