الإسعافات الأولية للحروق.. أهم شي ابتعدوا عن الزيت والثلج!

كلنا يوماً ما ممكن نتعرض للحرق سواء بشكل شخصي أو لحدا قريب مننا، لهيك لازم نعرف شوية نصائح أساسية بتضمن الإسعافات الأولية للحروق. ويلي للأسف في معلومات مغلوطة عنها كتير ممكن تؤدي لتفاقم الإصابة.

سناك سوري – استشارات طبية

أول شي ممكن نعمله خلال الإسعافات الأولية للحروق وهو أهم شي إيقاف عملية الحرق فورًا عن طريق إبعاد الشخص عن مصدر الحرارة أو إطفاء اللهب بالماء. وفي قبلا النصيحة صفر وهي الأمان، يعني لحتى نسعف حدا لازم يكون المكان آمن، ونكون مأمنين على حالنا. لأن ببروتوكول الإسعاف سلامة المُسعف أهم من سلامة المريض، مشان ما نكون بواحد نصير بـ2.

بعدين لازم نبرد الحرق تحت الماء الجاري البارد أو الفاتر لمدة 20 دقيقة على الأقل. هذا يقلل من الألم والتورم وخطر التندب فيما بعد. ماء الصنبور حصراً، أنه نغطس الحرق بجاط مي هوي مو كتير مفيدة، بس انو نحط حليب او معجون سنان أو زيت أو اي شي، هون الكارثة.

من الضرورة إزالة أي ملابس أو مجوهرات بالقرب من المنطقة المحروقة، ولكن لا تقم بإزالة أي شيء عالق بالجلد، اذا شي ملزق اتركو وبسرعة عالمشفى.

غطوا الحرق بشكل فضفاض باستخدام غلاف بلاستيكي أو كيس بلاستيكي نظيف لمنع أي جرثومة تدخل.

كمان يمكن تناول مسكنات الألم المتاحة يلي بتنعطى دون وصفة طبية مثل الأسيتامينوفين أو الإيبوبروفين إذا لزم الأمر.

لا تضعوا الثلج أو الزبدة أو الكريمات أو معجون الأسنان على الحرق، التلج يا حلوين بيعمل حرق برد وممكن يعمل تنخر. واي مادة ممكن نحطها عالحرق ممكن تعمل إنتان لأن الجسم فقد الجلد يلي بيحميه من الجراثيم.

اطلبوا العناية الطبية الفورية للحروق الكبيرة، والحروق العميقة، والحروق في الوجه/اليدين/القدمين/الأعضاء التناسلية. أو إذا كان الضحية رضيعًا أو شخصًا مسنًا، وأي حرق على المناطق التناسلية أو مناطق المفاصل في اليد أو القدم هو حرق يستوجب مراجعة الأطباء خاصة عند الأطفال.

أعد المحتوى الدكتور “غدير برهوم” – موقع سناك سوري