وزارة العشر دقائق للسيدة كهربا .. والليدات تضيء ليالينا بتواضع مواطن عادي

لا أخفي شعوري بالامتنان والميل لصالح مخترعي “الليدات” مقابل “الكهربا” فهم من أناروا ليالينا المعتمة في غياب نور التيار الذي أتعبنا انتظاره.

سناك سوري – خاص

في البداية يجب توجيه الشكر للثلاثي الياباني “إسامو أكاساكي” و”هيروشي أمانو” و”شوجي ناكامورا”. الذين طوّروا مشروع صمام ثنائي باعث للضوء الأبيض LED. واستحقوا عنه حصد جائزة نوبل للفيزياء عام 2014. أما “توماس أديسون” مخترع المصباح فلا نقول غير ( الله يرحمو ما كان في داعي لهالاختراع).

الكهرباء في دول العالم

في كل دول العالم هناك كهرباء يتمكن عبرها المواطنون من تشغيل المكيفات في أيام الحرارة المرتفعة كهذه الأيام. بل وحتى بإمكانهم تشغيل البراد وشرب المياه الباردة. حتى أن طعامهم لا يتعفّن داخل البراد إن بقي ليوم إضافي.

الكهرباء في الهونولولو

أما في “الهونولولو” فهذه الأشياء أقرب لعالم الأحلام لأن السيدة “كهربا” ( تقيلة علينا وشايفة حالها واذا زارت شي بيت يا دوب تقعد 10 دقايق وتمشي وأحياناً بتزعل من بعض الناس فما بتزورهن بالمرّة).

والسيدة “كهربا” لها وزارة خاصة بها. أي أنها تحظى بدلال حكومي خصّص لها مبنىً وفروع في المحافظات ووزير وموظفين وعمال ومهندسين وميزانيات وتعهدات والذي منو. وتتحدث صفحات رسمية عن أعمال صيانة وتصليحات ومواجهة أعطال. وكل ذلك يحدث دون أن نراها ( كيف ما بعرف .. بس يمكن هالكهربا ما بتروح غير عند جماعة وزارتا اللي عندن خطوط ذهبية جاييها إعفاء من التقنين .. الله يطعمنا متل ما طعمهم).

ومن الميزات الإضافية للسيدة “كهربا” أن لها فاتورة شهرية تحمل عبارة  «تخيل حياتك بدون كهربا» (أنو شو بدي أتخيل وأنا عايش الواقع .. يارب يكتبولنا بالتحديث الجديد تخيل حياتك مع كهرباء.. مشان أحفادنا بلكي بشوفوها ويحلوا نظرهم فيها).

الليدات اختراع العصر

بعد ما خلصنا نميمة عن السيدة “كهربا”..جيبولي هالليدات نمدح فيهم،.أنه دخيل عينهم بالـ 10 دقائق اللي بتجي فيهم الكهربا بتشحن البطارية وبيشتغلوا معك طول اليوم (دخيل عينه المتواضع.. مو متل بعض عالم بدون ذكر أسماء “كهربا” نفسيات حامضة).

وطبعاً هالليدات ما الهم وزارة وبيقدر أي مواطن عادي يستخدمهم ويشتريهم..وأكبر مشكلة فيها لليد أنت بتقدر تحلها بالتبديل (يعني بالمشرمحي المواطن بيحل مشكلته يإيده مافي داعي يدق للشركة.ويضل منتظر 3 أيام ع أمل تجي وتصلح مشان الـ 10 دقائق اللي ممكن الست الكهربا تعمل زيارة فيهم).