علاج تساقط الشعر الأكثر شهرة: أهم الأسئلة الشائعة عن المينوكسيديل
أهم 6 أسئلة لدى يلي بيعانوا من تساقط الشعر وبدن يستخدموا المينوكسيديل
رغم كل التقدم العلمي بمجال طب الجلد و علاج تساقط الشعر، بقي المينوكسيديل متربع على عرش العلاج، من حيث الفعالية والثمن الرخيص. وقلة الآثار الجانبية (كامل الأوصاف)، وكتير أسئلة هامة بتجينا من قبل المرضى على هاد الدواء، رح نحاول نجاوب على أهمها.
سناك سوري-استشارات طبية
أديش بخلي بخاخ المينوكسيديل على شعري قبل ما غسلو؟
بداية أكيد ما منغسل الشعر مباشرةً بعد البخ، ويفضل نخليه أربع ساعات على الشعر قبل غسلو، مشان نحصل على أكثر فائدة ممكنة.
صح اذا وقفت المينوكسيديل رح يرجع شعري يتساقط متل قبل؟
هاد الكلام صحيح نسبياً، صحيح بأمراض وراثية جينية مثل الصلع الوراثي أو الصلع الذكوري، لأنو العيب جيني مارح نقدر نصححو بالمينوكسيديل. ولكنه غير صحيح بالنسبة لأمراض أخرى مثل الحاصة البقعية أو الثعلبة، هون مارح تخسر التحسن بعد إيقاف المينوكسيديل حيث بيتم علاج تساقط الشعر تماماً. ولكن يًفضل إيقاف المينوكسيديل بشكل تدريجي بكل الحالات.
ممكن استخدم المينوكسيديل على فروة رطبة؟
ممكن.. وكمان ممكن هالطريقة تزيد من تأثير المينوكسيديل وفعاليتو، ولكن بدنا ننتبه على نقطة هامة، انو رح تزيد الآثار الجانبية، مثل تهيج جلدة الرأس.
في أدوية بتقلل من فعالية المينوكسيديل؟
الأسبرين ممكن يقلل من فعالية المينوكسيديل، لهيك إذا كنت عم تاخد أسبرين استشير طبيب القلبية (مو جارك الي معو مرض قلب).
في دوا تاني ممكن استعملو مع المينوكسيديل لحتى زيد الفعالية؟
الدراسات بتقول انو إضافة الفيناستيريد أو دوتاستيريد الفموي إلى جانب المينوكسيديل يُحدث فرق كبير بعلاج الصلع الذكوري. والكلام حول الآثار الجانبية من ضعف جنسي وغيرها عند الرجال صحيح ولكن مبالغ به.
دكتور رح يرجع شعري طبيعي بعد استخدام المينوكسيديل؟
الحقيقة إنو الشعر يلي رح يطلع رح يكون خشن شوي، لأنو المينوكسيديل بيغذيه بطريقة زائدة، وكمان بيعمل تغير ببصيلات الشعر. ولكن خلينا نكون ممتنين لهاد الدواء يلي لولاه ما كان عنا أمل باستعادة نمو الشعر (فليحيا المينوكسيديل).
وفينا نختم بأهم نصيحة عند استخدام المينوكسيديل، وهيي إننا لازم نتجنب أشعة الشمس بعد استخدامو بعدة ساعات. لأنو الشمس بتعمل تفاعل مهيج على الفروة، وهاد أشيع تأثير جانبي بيعملو المينوكسيديل.
