سناك سوري-حظ ونحس وأبراج
برج الحمل
ينصحك فلكي سناك بالتخفيف من أعمالك هذا الأسبوع يعني صح الوضع صعب بس مافي داعي تحمل عشر بطيخات بإيد وحدة، جرب مثلاً تاخد بريك وتروح تصيف بشي منتجع من هدول تبعون “المسائيل”، وإذا ماكان معك مليون ليرة كميزانية للتصييف، إملي “طشط” مي وسلطن جمبو مع العيلة، وماتنسى تشكر الحكومة والمعارضة على نعمة دوام المي والأوكسجين.
برج الثور
حضرتك اليوم محسود من مديرك بالشغل، شكلو سمعان إنك رح تستلم محلو الله يجيرك منو، حاول امتص غضبو وفهمو قديشك مسكين وماعندك واسطة، نصيحة فلكي سناك لإلك هالأسبوع تعلم كيف تكون سلال لتقدر تعيش.
برج الجوزاء
عندك طاقة زايدة اليوم وحماستك متقدة، ولكن كل هي الطاقة والحماسة رح تتبدد بالسرافيس وباصات النقل الداخلي ومارح تظبط معك توصل عالشغل إلا لتكون كرهت حالك وعيشتك، بسيطة روقنا واتذكر قدي الحكومة والمعارضة عميتعبوا على حالن ليأمنولك هالجو السلبي لتعيش فيه.
برج السرطان
تواضعلك شوي اليوم، يعني إذا حضرتك مدير أو وزير أو رئيس شي منصة معارضة ماضروري تشخط بالناس وتتمقطع فيهن، تذكر إنو الدنيا دوارة ورئيس المنصة اليوم تايب راجع لحضن الوطن بكرة، وكمان وزير اليوم مواطن عادي مريش شوي بكرة، بيقولوا لا يصح إلا الصحيح خليك صحيح يا صحيح.
برج الاسد
بتتذكر هداك الصديق الي طلبت منو دين 10 ألاف ليرة لتشتري فيهن جوز للمكدوس؟، اليوم رح يستجيب لطلبك ويبعتلك ياهن، وهذا الأمر رح ينعكس على صحتك ونفسيتك حتى إنو حضرتك رح توقف “لعن” المعارضة والحكومة واليوم الي اجيت فيه على هالدنيا، فلكي سناك بيباركلك هالإنجاز.
برج العذراء
إذا كانت لاجئ بشي بلد أوروبي عندك اليوم فرصة لتثبت براعتك وتفوقك، الي ماقدرت تثبتن ببلدك لأنو مديرك خاف تسرق الأضواء منو وتشفط الكرسي تبعو.
برج الميزان
إن شالله ألف مبروك الدعم الي ناطروا جاييك عالطريق والوظيفة الي قدمت عليها قبل فترة رح تصير بالجيبة اليوم، وهذا الشي رح يأثر على علاقتك ببيت حماك الي مارح يترددوا بتزويجك من بنتن بعد ما تنعفى من القتال عالجبهات، وعيش يا كديش.
برج العقرب
رح تبهر رؤساءك اليوم بالإنتاجية العالية لفرع الشركة الي حضرتك مستلمو ويمكن تترقى لتمسك الشركة كلها، بس انتبه كتير منيح يكتشفو الرقم الحقيقي للأرباح وهيك بتخسر الشركة والفرع ومابيعود فيك تستمر بالشفط، تذكر منيح إنو لتاكل العشرة لازم تطعمي التسعة.
برج القوس
مرحلة جديدة بحياتك العملية رح تنتقل فيها من حضن المعارضة لحضن الوطن، ولحتى تكون النتائج مضمونة لازم تعلن توبة مقنعة ببعض الدموع وشوية من التأثر والندم الي لازم يكون واضح جداً على محياك الجميل، انتبه منيح وظبطها بمعرفتك مابينخاف عليك، وكمان ممكن تعمل انشقاق بس راحت موضتو هالأيام.
برج الجدي
عمتحاول تتعلم الدهلزة وماعمتظبط معك، حيران وغيران من رفيقك “الفسفوس” وعمتحاول تاخد مكانو عند المدير، فلكي سناك بينصحك بشوية تركيز على الموضوع وبيبشرك إنو رح تصير فسفوس المدير الجديد، ريتو ألف مبروك.
برج الدلو
ضغط العمل اليوم فوق ماتتصور وهذا شي طبيعي لشخص راكض ورا الدنيا ركض الوحوش، انتبه منيح ياوحش من لحظة الانهيار صحي مابينخاف عليك بس الحرص واجب، فلكي سناك بينصحك تترك شي شغل من الي عمتشتغلن مع زودة الراتب الجاية يمكن بعد شي كم سنة من هلا.
برج الحوت
عندك حظ كتير كبير اليوم جرب خود ورقة يانصيب إذا كان معك حقها، ولحتى تحافظ على حظك لازم تحافظ على مسافة واحدة من الجميع حكومة ومعارضة الاثنين صار الن كلمة بهالبلد ولازم تتعلم ماتزعج حدا منهن لتحافظ على مكتسباتك.
