سناك سوري-حظ ونحس وأبراج
الحمل
ينتظرك اسبوع حافل، خفف من أكل الحلويات “يعني إذا عمتاكل حلو من عند العالم مو ضروري تجتروا اجترار حرام عليك صحتك”، وبينصحك فلكي سناك بالتقرب أكثر من أم العيال الدنيا عيد قوم بوس على راسها وصالحها وحاج تكشر بوجهها، المخلوقة صابرة متلا متلك.
الثور
فايق وعيونو ورمانين كل الليل كان سهران يسامر خاروف العيد الي اشتراه بدم قلبو، الثور خاف عالخاروف من شي قذيفة غافلة أو رصاصة طايشة كان مصر يا يعيش معو يايموت معو، الله قدر ولطف ورأف بحالتو، نجا هو والخاروف، فلكي سناك بيهنيك على هالحظ.
الجوزاء
مهموم وعمينبش بالخزانة، عميفكر شو بدو يلبس تياب ماظبطت معو وماقدر يشتري تياب جديدة، وهو الي بتعنيلو الاناقة كتير، خلص دبرها بنطلون جينز والبلوزة البيضا وقوم انطلق عايد البشر لاتهكلو للهم كلن متلك ماحدا قدر يشتري، الحال من بعضو.
السرطان
كمان السرطان عاش ليلة صعبة لساتو لهلا سخنان على حق الخاروف الي تخورف فيه من عند البياع، اكتشف إنو دافع زيادة وجارو الفهمان مشتري خاروف اكبر من خاروف السرطان وبنفس السعر، بيعينك الله، الله يتقبل منك قوم افردها وجهز العيدية للأولاد ولا تنسى أم الولاد ناطرتك على دقرة.
الأسد
مهموم هالفترة وزعلان، رجع الماضي لحضنو من جديد وماقدر يعمل شي غير إنو يدير ضهرو ويمشي، معلش طول بالك بدها صبر وحمد، قوم امسح وجهك بالرحمن واتأنق متل عوايدك وانطلق عالمعايدات.
العذراء
ولا شي ممكن يعكر صفو هاليوم العذراء لساتو محتفل من مبارح بفوز المنتخب السوري، هو كتير مبسوط لدرجة إنو فاق الصبح قبل مدامتو وجهز القهوة وفيقها على ريحتها، مبروك عليك يامدام العيد صار عيدين.
الميزان
عمتتغندري كتير ميك أب وبديكور ومنيكور وخلافو، الله يعين شباب العيلة اليوم عليك، رح تكوني نجمة هاليوم، بس انتبهي من سميرة بنت خالتك عيونها رح تنبظ عليكي مو شايفة كيف زوجها معجب فيكي وعميقلها شوفي شو طالعة حلوة.
العقرب
العقرب لساتو نقمان عالحكومة كان ناطر المنحة تبعت 35 بالمية، ياحسرة راحت وهو هلا مضطر إنو يلعن حظو على ساعتو على ساعة الحكومة وساعة المعارضة، عندو ساعات كتير اليوم ليلعنها، بعدك بأول النهار امسح وجهك بالرحمن واستنى على الزيادة على أول السنة متل ماقال هداك الوزير.
القوس
لسان حال القوس عميقول اليوم بدي افرح وبدي انبسط وبدي هيص، ينباعوا بالعزا حكومة مع معارضة مع حرب، مبروك عليك التأقلم ياكبير.
الجدي
الجدي عندو حنين كتير اليوم عايش بالغربة ومشتاق للبيت ولولاد الحارة ومشاوير العيد ومعمولات أمه وحكيات خواتو، تارك الجمل بما حمل برا باب بيتو وفاتح فيس وعميقرا ويتذكر هديك الأيام الخوالي، الجدي مو مطول قرر اليوم إنو رح يرجع والعيد الجاي حيكون مع أهله وناسو بسوريا.
الدلو
بدو يعيد وبدو يخلص شغل البيت وبدو يخلص شغلو الأساسي وكمان ناطر يلبس تياب العيد تبع العيد الماضي وهكلان هم كل هالبطيخات كيف بدو يحملن كلن دفعة وحدة، حبيبنا يادلو إنت قدها وقدود المهم اتروك التفكير وقوم بلش رح يخلص النهار ياشيخ.
الحوت
جهز سفرة العيد رتبها وأنقها وناطر الجماهير الزاحفة للمعايدة، بدو يغلب الكل ويتفوق عليهن ومين هي الي رح تكون سفرتها أرتب وأحلى من سفرة الحوت إي ماخلقت ولا كانت، فلكي سناك بينصحك تهتم شوي بنصك التاني قد ربع اهتمامك بسفر العيد.
