سناك سوري-حظ ونحس وأبراج
الحمل
لديك أسبوع إيجابي جداً لا يقل تفاؤلاً عن المشاركين في أستانا-6، الأمور في تحسن دائم، دير بالك من العين، وإلبوس قميصك بالمقلوب وعلق خرزة زرقة، نصيحة فلكي سناك إلك هالاسبوع حافظ على تفاؤلك ما أمكن فالتفاؤل هو الثروة الوحيدة التي بإمكاننا الحفاظ عليها واستثمارها دائما وفي كل الظروف.
الثور
أسبوع للعمل بامتياز، أمامك كتير من المسؤوليات الكبيرة إنت قدها مابينخاف عليك، المسؤوليات الكبيرة هي عمل رح تقوم فيه وليس كرسي رح تقعد عليه، حتى ماتفهمنا غلط يعني، حاكم كل الشعب مفكر المسؤولية كرسي، فلكي سناك بينصحك بأكل الشوكولا فانت تحتاج لطاقة كبيرة، جرب الأنواع الرخيصة حتى ماتسب علينا آخر الشهر.
الجوزاء
عندك كاريزما فظيعة هالاسبوع عمتستقطب الكل، والكل بدو رضاك وحضورك، وكل هذا سيؤهلك لتبدع في عملك الجديد ببسطة البندورة، ماقلنالك من الأول اقلبها بندورة بدل الفواكه، لك الشعب مامعو يشتري فواكه يافهمان، البندورة حظها أقوى أرخص والمواطن بحاجتها كتير، مبروك عليك البسطة، بسطة الرزق ان شالله عفوا آية الرزق إنشا الله.
السرطان
لك عيني تعال قلك شي، على شو بالش مشاكل مع هالبشر وبتضل تتفشش بالعالم حواليك؟!، مافي شي مستاهل الله وكيلك هي الأمور عمتتحلحل مناطق آمنة وصار عنا وقوات سلام ورح يصير عنا، بلدك صارت بلد الكل معقول تفكر تطلع منها وماتقوم بواجب الاستقبال؟، فلكي سناك بينصحك تضل متذكر إنو الإنسان متل البني آدم بس قطعولوا راسو بيموت ومافي شي مستاهل، روح الله يرزقك طولة العمر والرزق الكبير.
الأسد
امسوك إيدك شوي ياروحي، حدا بيصرف 10000 ليرة باسبوع، إي والله لو حاتم طي كان حاجتك، على سيرة حاتم طي معك تدينا 5000 ليرة لآخر الشهر؟ ومن بعدها بلش مسكة الايد، مو ايدك التانية لا قصدنا بعد إيدك عن جيبتك شوي، وخبي قرشك الابيض للأيام السودا حاكم ماصفيلنا بسوريا غيرها الله يدملنا الحكومة والمعارضة، بس ليك فيك تحلم، الحلم حلو كتير وبيجيب نتيجة على ذمة قانون الجذب.
العذراء
أستانا شاغلة العذراء جداً، المسكين مفكر إنو بعد أستانا رح ينزل الدولار ويصير فيه يصمد من راتبو كم ليرة ليشتري بيت، حلم إبليس بالجنة والحكومة وين راحت على قولة جودي ابو خميس إنها بالمرصادي، فلكي سناك بينصحك تاكل وتشرب وتعيش واحمود ربك غيرك ماضل معو ياكل.
الميزان
كم مرة قالتلك مدامتك وفر نصايحك لحالك، ليش دائما مصر تعرض حالك للإحراج، فلكي سناك بيقلك إنو هالاسبوع فرصة مناسبة لتسمع كل كلمة بتقلك ياها مدامتك، يعني هيك بتختصر مشاكل كتير وبنفس الوقت انت اسماع وسطح، أصلا هيك بتلهيها عن هم الراتب والمصروف الزايد.
العقرب
متلئمن كتير هالاسبوع لدرجة إنو اذا مالقيت حدا تعضو رح تعض حالك، دبان وجهك عميهرب منك، والله مافي شي مستاهل، كل الأمور بدها وقت، اتروك كل شي للوقت وشغل اركيلتك وبخبخ عليها تنجلي، اسبوع للأركيلة بامتياز.
القوس
من المعروف فلكياً أن برج القوس يعشق الذهاب إلى أماكن الحروب، وهي الله ماحرمك حطك بنص الحرب، والله يستر ماتكون شي قيادي بالمعارضة، أو ضابط بالجيش هيك منتبهدل، خلص روقنا شوي انسا قصة الحرب وصالح، والله مشوار على هالنهر بيرد الروح الي بتاخدها بواريد وقذائف الحرب.
الجدي
متيس عالآخر، والله فلكي سناك مشتهي يشوف واحد سوري خالي من العقد، إنو معقول شقفة حرب إلها سبع سنين تخليكن تكرهو الحياة كل هالكره، شيل عقدة التيسنة من بالك اصلا التيس هو الجدي لما يكبر بالعمر والحمد لله بسوريا ماعميخلو حدا يكبر بالعمر كلو عميموت، واضحك للدنيا بيضحلك آخر الشهر.
الدلو
ليك ولك حبيبي تعا لهون على شو نافشلي ريشاتك، طلعت نزلت كلك شقفت سطل لا بيقدم ولا بيأخر، روح شوف الروسي والأميركي ..الخ شوبدن وانت نفذ بس، انت اعترض مافي مشكلة، لك كمان سجل موقف مافي مشكلة، غير بالقرارات لغوياً كمان مافي مشكلة، كلو مسموح مادامك رح تنفذ وأصلا انت ماعندك خيار تاني.
الحوت
الحوت يمضي حياته عمياكل بالسمك الصغير ليجي بعدين صياد يصيدوا ويعمل منو علب تونة يبيعوها للفقراء والمقاتلين، بالمقابل الحوت هو سياسي كبير هيك الفلك بيقول عنو، يعني صديقي السياسي آخرتك رح تتاكل من المقاتلين الي اضحكت عليهن، مو بس رح ياكلوك، هني كمان رح يهضموك وبعد الهضم رح يخرجوك لترجع للأرض الي رح تنتقم منك وتذكرك بريحتك النتنة دائماً.
