فقر الدم المنجلي: أهم 5 نصائح للمصابين فيه
مع اتباع النصائح يمكن لمرضى فقر الدم المنجلي متابعة حياتهم بشكل طبيعي
فقر الدم المنجلي هو أحد الأمراض الشائعة نسبياً، وخاصةً بالمناطق الساحلية (كلشي الو ضريبة، حتى البحر). وسببه جيني أي غير معدي ولا يمكن الوقاية منه.
سناك سوري-استشارات طبية
ينجم هذا المرض عن طفرة بتعمل خلل بشكل كرية الدم الحمراء، بيصير شكلها متل المنجل، هاد الشي بيقصر من عمرها ويخليها تتخرب أسرع. وبالتالي فقر دم، وممكن تتكدس فوق بعضها وتعمل خثرة تسد أحد الشرايين بأي مكان بالجسم، يعني ممكن تعمل جلطة.
تخرّب الكريات الحمر، بينجم عنو تشكل البيليروبين وهاد بيخلي المريض أصفر، وهاد التخريب بيصير بالكبد والطحال. لهيك ممكن يتضخمو بشكل كبير، وممكن نضطر لإزالة الطحال جراحياً.
أول نصيحة لمريض فقر الدم المنجلي، هي شرب السوائل بكميات كبيرة لأن ممكن نقص السوائل يحرض نوبة المنجلي. ويجب مضاعفة كمية السوائل بأوقات الحر.
النصيحة الثانية، هي التمارين الرياضية المعتدلة، وليس المجهدة، وفي حال وجود نوبة منجلي فعالة. ما لازم أبداً نقوم بأي نشاط.
النصيحة الثالثة، أي عارض مزعج عند مريض فقر الدم المنجلي هو عارض خطير يستلزم استشارة الطبيب. وربما القبول في المشفى، لهيك مافينا نتهاون مع أي عارض يصيب مريض او مريضة فقر الدم المنجلي.
النصيحة الرابعة، مو كل الأدوية منقدر ناخدها اذا كنا مرضى منجلي، لأنو في أدوية بتحرض المرض، لهيك مامناخد أي دواء دون استشارة الطبيب.
النصيحة الخامسة، مريض فقر الدم المنجلي لازم على طول ياخد فيتامينات سواء من خلال الغذاء الصحي والمتوازن، أو على شكل أدوية. وخاصةً الفيتامينات والمعادن الضرورية لتكوين الدم مثل الفوليك أسيد وب١٢ والحديد، لأن دم مريض المنجلي في حالة تخرب وتجدد مستمر.
مرض المنجلي هوي مرض يتطلب الحذر، ولكن ما بيعني انو عاجزين نكفي حياتنا بشكل طبيعي، وفي مرضى منجلي كتير عم يكملو حياتن بشكل طبيعي. وعم يكونوا أشخاص منتجين وسعيدين بالمجتمع.
