أنواع سرطان الجلد: 3 أنواع رئيسية وكيفية وقاية أطفالنا منها
مو كل "الشامات" سليمة وهيك بتعرفوا الشامة يلي سببها سرطان الجلد
هناك 3 أنواع لسرطان الجلد والذي هو السرطان الأكثر شيوعاً، النوع الأول هو الأسلم والأبطأ سيراً (أبلد واحد ومالو حيل يئذي) اسمو سرطان قاعدي الخلايا.
النوع الثاني هو سرطان حرشفي الخلايا بطيء كمان ولكنه أسرع بشوي من اللي قبلو وبيكثر عند المدخنين وعالشفة السفلية والأذن.
أما النوع الثالث فهو سريع وخبيث وبينتشر بسرعة وهوي الميلانوما الخبيثة، وهاد النوع يلي رح نركز عليه أكتر.
سناك سوري-استشارات طبية
بما انو أول نوعين من أنواع سرطان الجلد بطيئين فغالباً بيجي المريض لعند الطبيب بمرحلة مبكرة قبل ما ينتشر لأماكن تانية غير الجلد. ولكن النوع الثالث الميلانوما الخبيثة ممكن ينتشر بسرعة.
في كتير عوامل تساهم بالإصابة بسرطان الجلد. مثل أشعة الشمس والبشرة الفاتحة والتدخين (الصديق الوفي لأي سرطان). والوراثة وغيرها.
الميلانوما الخبيثة ممكن تكون على شكل بقعة متصبغة ممكن يسموها الناس وحمة أو شامة أو الخال، وبعدين يصير فيها تغيرات وتتحول لسرطان.
طبعاً مو أي شامة هيي سرطان، ولكن وظيفتك تراقب الشامة إذا كبرت أو نزفت أو تقرحت أو تغير لونا أو تغير ملمسها، وفي حال تغير فيها أي شي بتراجع طبيب الجلدية فوراً. لأن متل ما منعرف أهم شي بأي سرطان هو التشخيص الباكر، لهيك اسبقه قبل ما يسبقك.. (يلي بيسبق بياكل بندق).
أثبتت الدراسات بإنو تعرض الطفل لأشعة الشمس بشكل مطول، والتسبب بحروق شمس، بيزيد فرصة الإصابة بسرطان الجلد عندو بالمستقبل.
لهيك أهم شي هو الوقاية من الشمس عن طريق واقيات الشمس والألبسة الطويلة وتجنب اوقات الذروة، والإقلاع عن التدخين بشكل كامل سلبي أو إيجابي أو محير أو حتى سيكارة باليوم، ومراجعة طبيب الأمراض الجلدية في حال الاشتباه بأي آفة جلدية.
