سناك سوري-حظ ونحس وأبراج
الحمل:
يقول علماء الفلك والأبراج في سناك سوري إنك مريش هالفترة وع متاكل ثمار بحر وخلافو يعني أكل ولاد العز، أصلاً بيقولو إنو برج “المسائيل” والقياديين يعني ممكن يكون برج السيد رياض حجاب، بينصحك الفلك اليوم تخفف من إلتهامك لثمار البحر خصوصاً المقلي منها “جرب كول قجاج مشوي مثلاً أو وزع شوي منها على عائلة فقيرة بتكثب ثواب وبتريح كرشك شوي”، وأما مهنياً فأبشر عندك اليوم صفقات ماكنة وشراكات جديدة رح تحصد من خلالها الأخضر واليابس.
الثور:
بيقلك الفلك دير بالك من إثارة المشاكل مع الشريك وخليك هادي، يعني إذا مرتك بلشت سق ونق عالمصروف والمصاري وشهر المونة، لا تجادلها حط الحق عالحكومة والراتب “أصلا هني سبب مشاكلك”، وأما مهنياً فأجل المفاوضات اليوم “خصوصاً إذا كنت بتشتغل بوزارة المصالحة”.
الجوزاء:
بينصحك عالم الفلك تبع سناك سوري تكون أكثر تسامحاً “جرب طريقة الحكومة بالتسامح مع العائدين لحضن الوطن”، خصوصاً مع زملاء العمل، وبيقلك الفلك كمان بطل سهر رح تدمر صحتك، لك أخي خلص اتروك هم البيت والاولاد والراتب ومصاريف المدرسة واحتياجات البيت والله مو مستاهلين هالقد من التفكير والسهر شوف الحكومة كيف بتضل رايقة ومطنشة جرب صير متلا.
السرطان:
بعد ماتركيتك حبيبتك لأنك مقاتل منتوف ما مبين مستقبلو لوين رايح بينصحك الفلك تدور على وحدة تانية تحبك وتحبا وإذا مالقيت فعوضك عالحكومة والمعارضة الي ماعطيوك راتب متل الخلق وورطوك بهالحرب، مهنياً الفلك بيخبرك إنو عندك مجال مهني جديد يعني ممكن تتسرح أو تعمل تسوية قول الله، بس كمان يمكن ينقلوك على جبهة تانية.
الأسد:
بيزفلك الفلك خبر إنو رح ترجع المياه لمجاريها بينك وبين مديرك مو بس هيك لا وكمان رح تعيش مرتاح وتعرف ملذات كتيرة “ياملعون شكلك صرت مسيح جوخ برابو عليك مابتقصر”، وبالنسبة للصحة بحسب فلكي سناك سوري بكفيك نوم يازلمي قوم اتحركلك شوي، يعني إذا تصالحت مع مديرك بتبطل تنزل عالدوام وبتقضيها نوم، قوم حرك دماتك شوي قوم.
العذراء:
التوتر ماعمبيفارقك ليش؟ شكلك معارض وماعمتعرف كيف بدك ترجع لحضن الوطن، مدري موالي ماعمتعرف كيف بدك تظبط أمورك بشهر الميم الي انضاف لهمومو هم العيد وشغلاتو، وكل الله وارتاح، العب رياضة وطنش.
الميزان:
ببشرك فلكي سناك سوري إنو حربقتك وزكائك رح يجذبو إليك رجال أو نساء الأعمال المهبرين والي رح يقدمولك عروض كبيرة، يا محتال إنت يامحتال دلنا كيف عملتا لنلحس اصبعتنا شوي ونقب على وجه الدنيا، صحياً لا بقى تتدلل على الي حواليك متل التور إنت وصحتك حديد.
العقرب:
الظاهر إنو أصحاب هالبرج معظمهن من الي سافروا برا البلد لأن الفلك بيوعدهن بفرص كتيرة لإثبات الذات وتطوير الأعمال وهذا شي من زمان أفقدتنا ياه الحكومة الي خلتنا نركض نركض مانلاقي، إيه روح الله يتممها عليك ويرزقنا متل مارزقك من سفر وفرص.
القوس:
علق خرزة زرقا وعلقها أو لبوس قميصك بالمقلوب اليوم لأن الفلك بيقلك إنك ماشي ورا هدفك من دون أي مصاعب أو مشاكل أو حتى اعتراض من مديرك بالشغل، يعني اليوم رح تفيق تلاقي حق ربطة الخبز عالبارد المستريح وتمشي نحو هدفك في احضارها إلى المنزل ورح تنجح بدون ماتكمشك مرتك وتبلش طلبات وبعدا رح تطير عالشغل ويكون مديرك متأخر ومارح يلاحظ إنك تأخرت شوي، مبروك عليك الهدف خيو.
الجدي:
عندك شغل كتير اليوم الله العليم مقرر تعزل البيت وتنضفو، لا تخاف رح تنجح بمهمتك لأن الفلك بيقلك عندك أهداف ضخمة رح بتحققها اليوم، يعني أي أهداف ضخمة خارج هالإطار مارح تظبط معك الحكومة والمعارضة لكم بالمرصادي على قولة جودي أبو خميس.
الدلو:
قال حاول التخفيف من الجلوس خلف مكتبك لساعات طويلة، يعني إذا كنت مسؤول قوم اتلحلحلك شوي اتحرك انزول عالشارع شوف حال البشر والعباد الي حضرتك مسؤول عنهن حاج تنبلة، وأما مهنياً والله ياعزيزي اليوم رح يعترضو على مشاريعك يعني إذا في شي هبشة ماكنة بالطريق أجلها شوي أحسن ماتنكشف ويعفيك خميس إنت كمان، هدي اللعب شوي اليوم.
الحوت:
يمكن ها يمكن والله أعلم رح تجيك رزقة مرتبة لدرجة إنو ممكن تخلص فيها مونة المكدوس وحبة مسك، لا تطمع كتير حبة المسك يعني يادوب تكفيك آجار مواصلات لآخر الشهر.
جدير بالذكر أن فقرة الأبراج هذه إضافة جديدة لـ سناك سوري تنشر لأول مرة اليوم ونتمنى أن ترشدكم أبراجنا لكيفية قضاء يومكم.
