مختار “أم الطنافس” يوضح للناخبين أسس إختيار مرشحينهم..

والمرشحين بتختارون بحسب برامجون الانتخابية مو بحسب صورون أو المعونات الي بيوزعوها.. لأن صوتك بيأثر..

سناك سوري-رام أسعد

بقي لإنتخابات الإدارة المحلية كم يوم فقط ومازلت حائراً كالعديد من أهالي “أم الطنافس الفوقا” لمن سأقوم بإعطاء صوتي (في حال قررت المشاركة)  وعلى أي أساس سأختار المرشحين الذين يمثلونني لذا توجهت لمقابلة المرشح للمجلس البلدي مختارنا ”عبد السلام بيسة“ للإستفهام منه عن ذلك ليدور بيننا الحديث التالي طبعاً بعد أن أقنعته بأن يضب “الختم الدائري” وبأننا لا نحتاجه في حديثنا..موقع سناك سوري.

-مختارنا ”بيسة“ حضرتك اليوم مرشح لإنتخابات الإدارة المحلية ممكن تفهمني ليش ح أختارك أنت أو أي حدا من المرشحين؟

-ليك ولا ابن اخوي..أتي عندك مرشحين عن أحزاب سياسية ومرشحين مستقلين والمرشحين بتختارون بحسب برامجون الانتخابية مو بحسب صورون أو المعونات الي بيوزعوها.. لأن صوتك بيأثر..

-إيه..اسمعوا على هالشوفة لا والحشا شوفوا على هالسمعة وك أشتهيت شوف صورة مرشح أو اسمع بحدا عم يوزع معونات بكل أم الطنافس الفوقا والتحتا والتخريمة حتى..بس مختار شو يعني هي برامج انتخابية؟. موقع سناك سوري.

-البرنامج الانتخابي ولا ابن أخوي هو خطة العمل الي حاطتها المرشح والي بيوضح فيا أهدافو ومشاريعو الي بدو يحققها لما يوصل لفوق.. يعني أنا عبدالسلام بيسة برنامجي الانتخابي أني زيد دعم المستوصف بحيث يقدر يخدم “أم الطنافس” وأني أضغط لزيد حصتنا من الزفت حاج كل مرة بيروح “لتخريمة الفوقا” بحيث بنود هالبرنامج تصيب أسفل منتصف الهدف الي هو مصلحة المواطن والزود عن كرامته بكل ما أوتينا من غالٍ أو نفيس..

وليك ولا ابن اخوي هاد البرنامج والخطة الموضوعة بيوضحلك أديش المرشح فهمان واقعو صح..بحيث مثلاً أنا ما معقول قلك أنو ببرنامجي الانتخابي حاطت الهدف أنو لاحق التهريب بأم الطنافس لأن هيك بكون عم لوفك لأن الكل بيعرف أنو المهربجية من التخريمة..وهلأ لو مسبق دقيقة كنت اخدت نسخة من برنامجي عطيتون لجودي وأسعد يوزعون ع الضيعة..

-طيب سيدي المختار البيسة المحترم.. هيك حكي بدها فت عملة كتير من وين عم تفتوا عملة؟

-هلأ ليك للصراحة شخصياً نظمية الله يرضا عليها باعت صيغتها لفت عملة..وبشكل عام فالقانون سمح للمرشحين عن أحزاب سياسية أنو تمولون أحزابون وللمستقلين (متل حكايتي) أنون يمولو حالون من أموالون أو يستعينوا بتبرعات جمهورن بس ياحسرتي من مين بدي آخد منك والي من عويدل والي من صويلح؟؟.موقع سناك سوري.

-ولووو عمي أبو جميل كلنا فداك وفدا كل حدا غيور ع مصلحة الوطن (متل مابتقول عادةً) بس ولو مختار سؤال محيرني.. شو يعني فئة أ وفئة ب؟

-ههههههه شغلة بسيطة هي الفئة أ هي فئة العمال والفلاحين والفئة ب باقي فئات الشعب وأتي بتختار مرشحين من الفئتين مو متل ماكان مفكر صويلح أنو بس من فئة وحدة.. وهلأ اسمحلي عندي مناوبة وكمين لأحدهم..

-أي مختار..حبينا أتي ع سيرة أحدهم كأني فهمت من سلنكو أنو رايح موعد عاطفي أو شي الله يهنيه..

-الله لايهنيه أنا بورجيه..

-بس مختار بس بخصوص الانتخابات ضل عندي كم سؤال..

-عليك وع الانتخابات عندي شي أهم.. والله لربي الأرض بهالشايع..

*هذه المادة أعدت بالتعاون مع حملة#دورك

اقرأ أيضاً: سلنكو يوضح لنا سريعا شو يعني إدارة محلية

المقالات المنشورة لا تعبّر بالضرورة عن رأي الموقع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *