درج المهاجرين.. سامر: لو يعطونا اسم هالحارة ونصير كلنا مهاجرين

درج المهاجرين قبل وبعد التلوين

سوريون يستغربون سرعة الاستجابة وآخرون يربطون بين اللون الأسود وعلم داعش

سناك سوري – دمشق

أثارت سرعة استجابة محافظة “دمشق” لشكوى أحد المواطنين، حول رفضه ألوان درج “حي المهاجرين” معتبراً أنها ألوان علم المثلية الجنسية، تساؤلات عديدة من قبل المتابعين للحدث الذي تحول لقضية رأي عام وتريند تداوله السوريون بشكل واسع على صفحاتهم في فيسبوك ومختلف مواقع التواصل الاجتماعي.

السوريون عبروا وفي إجابات مختلفة خلال تعليقاتهم على استبيان طرحه سناك سوري، جاء فيه “بعد أن استجابت محافظة “دمشق” لشكوى حول ألوان درج المهاجرين طمست ألوانه بلونها الأسود، أي الصورتين أفضل برأيكم؟”، عن استغرابهم سبب السرعة في الاستجابة لشكوى المواطن حيث قالت “دلال”: «كل الشكاوي الي عبتتقدم الكهربا والمي والبنزين وغيرو وهاد الي طلع معهم بالأخر ؟!يغيروا لون الدرج!! »،فيما قال “يونس”:«يا ريت بتستجيب هل محافظة لباقي الشكاوى بنفس السرعة اللي استجابت فيها لهي الشكوى هي اذا بالأصل عندا استجابة، بس الحكي ما بيجيب نتيجة».

“القصة ليست قصة ألوان فقط” هكذا علقت “رشا” وأضافت: «ما شافوا من كل اللي عم يصير إلا انو الدرج تلون ؟، يتفضلوا يشوفوا الحاويات اللي عم تتلون بدم الأطفال وقت ينجرحوا و هني عم ينبشوا، يشوفوا الأطفال اللي عم ينحرقوا بالشمس و هني عم يشحدوا بالشوارع».

وقريبا من ربط الألوان الزاهية بلون علم المثلية الجنسية، ربط البعض بين اللون الأسود ولون علم “داعش”، حيث قالت “ندوش”: «ليش الوان الفرح، خلونا بالوان داعش احسن»، في حين قال “علي” إنه حين كان صغيراً علموه بالمدرسة أنها ألوان قوس قزح، وحين كبر علموه بالفيسبوك أنها ألوان علم المثلية الجنسية، وأضاف: «على ما يبدو عمطبق الدولة منهاج الفيسبوك… مبروك دمشق الأسود يليق بك».

اقرأ أيضاً: الحكومة تسترد الحياء المخدوش وتزيل “عشتار” العارية (طب كنتوا غطوها)

“يامن” قال إن التسلسل بالألوان هو بالأساس تسلسل ألوان الطيف الناتج عن تحليل الضوء الأبيض بموشور حسب الأصل الفيزيائي، أما بالطبيعة فهذا التسلسل بالألوان هو تسلسل ألوان قوس قزح الناتج عن السبب الفيزيائي نفسه، وأضاف: «كل شخص حسب ثقافته وشو معبي مخه يرى هذه الألوان، الفيزيائي أو المهتم بالعلم بيشوفو ألوان الطيف .. المهتم بالطبيعة والمناخ بيشوفو قوس قزح .. يلي معبي مخه أفكار وكبت جنسي بيشوفو ألوان مثلية جنسية».

على عكس غالبية المعلقين قال “أحمد”: «خلو الموضوع فني بعيد عن أي شي تاني،بس الاسود بيلبق مع الدرج بشكل أفضل».

الأوضاع السائدة حالياً غلبت على رأي بعض المعلقين، ومنهم “ريم” التي قالت إن «الألوان لا تتناسب مع حالة المواطن والبلد الكئيبة التعيسة لذلك الدهان بالأسود معبر، و المحافظة بتمشي على نفسية المواطن».

حلم “سامر” بالهجرة عكسه في تعليقه على السؤال وقال: «آخ بس لو تظبط.. إن يعطونا أنا وكل السوريين اسم هالحارة بس.. لنصير كلنا (مهاجرين) ونترلكن الدرج والحارات وكل شي».

اقرأ أيضاً: اتهامات لدرج بالمثلية الجنسية.. محافظة دمشق تحل الأمر بالأسود القاتم

المقالات المنشورة لا تعبّر بالضرورة عن رأي الموقع