حجة المسؤولين شوي حصار جائر وشوي استجرار جائر

جديد الحكومة لشتاء 2019-2020 استجرار جائر (كهربا وانترنت).. 

سناك سوري – حسان ابراهيم

مما لا شك فيه بأن الشعب السوري شعب جبار وقادر على التكيف مع أسوأ الظروف وقد فعلها، لكن ألا يحق له بعد ما عاناه من قساوة العيش تحت القذائف وسط العنف والتهجير أنه -يشم ريحة ربه- متل ما بيقولوا بالعامية، الأخ المواطن شو طالب يا حزركن؟ هني شوية كهربا وجرة غاز ياخدها بكرامة ودفا لولادو بهالبرد الظنطاري، ومع شوية انترنت سريع مدعوم وبيكون ممنون شواربكن (معتبر حالو بمطعم وبدو سندويشة مخلل زيادة)!!!.

تعوا لنبلش بموضوع الكهربا وناخد “حمص” مثالاً عن تطبيق ما هو جديد من موديلات الحجج لشتاء 2019-2020 (شو قلبت موضة تياب !!) بعد ما تعودنا على عبارة الحصار الجائر كذا سنة ومعها كان نجم الوسائل الإعلامية معالي وزير الكهربا، انتقلت النجومية لمدير شركة كهربائها الذي أعلن بأن التقنين لهذا الشتاء سببه الاستجرار الجائر (والعشوائي) من قبل (الأخ المواطن) وخاصة في بعض الأحياء الشعبية، وهناك ضبوط نظمت بحق المخالفين وبالعشرات (يا مغيث) وأصدر تصريح موجود بصفحة الشركة الرسمية عالفيسبوك بأنو إذا ما بدكن تلتزموا فالتقنين والقطع القسري هو الحل المناسب لك يا أخي المواطن (نحن لك بالمرصاديي)!!!!.

موضوع الغاز مربوط بموضوع الكهربا والمازوت (ويا حسرة مازوت ما في) ومع البطاقة الذكية صار المواطن مجبور بجرة وحدة كل 23 يوم، ولبين ما يطلعلوا جرة على في وما في واليوم جاي الغاز بتروح القصة شهر ونص، بدو يطبخ ويسخن متة ويتدفا كمان وكله من هالجرة، ليش.. لأنو ما في مازوت والمية ليتر يلي استلمن عم يقنن فيهن طول الشتوية وحلها إذا بتنحل، والسبب كان الحصار الجائر والباخرة حبسوها بالبحر وهاي حقيقة ما بنكرها .. بس لازم يكون في حل (أو تفاجأتو بالشتوية)!!!.

الجديد جاي عالطريق وهو موضوع الانترنت والاستجرار الجائر له من قبل (الأخ المواطن) يلي تدلل وأخد راحته عالآخر فيه وكمان أخد وجه وصار يتفزلك عالفيسبوك ويتفصحن وكل هاد لأن الانترنت صايرلو ببلاش (تذكروا مشهد عادل إمام مع التاجر وقت قلو .. ساعة الكاش الغالي يبقى ببلاش) وهيك صاير فينا الظاهر، مشان هيك عم يحكوا بنظام الباقات المسبقة أو اللاحقة الدفع وكل هاد بسبب الاستجرار الجائر (مو باقي غير يقولوا أن الكثافة السكانية القادمة هي بسبب … الجائر ومع بعض مرة كل سنتين)!!!!!!!!!.

كله مرتبط ببعضه والسبب الحقيقي هو الحاجة والفقر يلي وصلتلو الناس وعم يزداد كل يوم وطبعاً حلول ما في واللي موعاجبه ينطح راسه بالحيط (حتى الحيطان ملت من المناطحة) .. بقا الله يرضى عليكن غيرولنا هالاسطوانة المشروخة ولاقولكن حجة تانية ولتكن بسبب توسع ثقب الأوزون بيكون أحسن وأقنع للأخ المواطن (ليش بس ثقب الأوزون عم يتوسع)؟؟؟؟

اقرأ أيضاً: نشرة أسعار حمصية أخي المواطن.. وأهم شي الكحول الإيتيلي (وبتقولوا ما عم نشتغل)

المقالات المنشورة لا تعبّر بالضرورة عن رأي الموقع