“بديعة” تناقش مع “ديبة” تفاصيل اللجنة الدستورية وناطرين الصلحة بين هدوك وهدينك

بديعة وديبة ناطرين حفلة تبويس شوارب.. قولكم بتصير ولا حلم إبليس بالجنة

سناك سوري-دمشق

باتت اللجنة الدستورية اليوم حديث الشارع السوري، “الكبير والصغير والمقمط بالسرير” وحتى “بديعة” وجارتها “ديبة”.

-بديعة لك بديعة شكلها الأمور تحلحلت عالآخر ورح تجتمع الدستورية (تقصد اللجنة الدستورية)

-إي شو يعني يا ديبة شو هيي رح ترجع يلي راح يعني ولا رح تنزل الدولار

-لك أي طبعا، اسمعي لقلك اسمعي، سمعتن مبارح لجماعة المثقفين بالضيعة شلة سلنكو والمختار ورفقاتن عميقولوا إنو بيكفي من هاللجنة تجمع هدوك مع هدينك وجه لوجه وعطاولة وحدة

-إي وشو يعني إذا اجتمعوا

-لك يا بديعة، ما في أشطر مننا نحن السوريين بتبويس الشوارب، بكرة فنجان قهوة من هون، كاسة شاي من هنيك بتتصافى القلوب وبنرجع متل الأول ان شالله

-الله يسمع منك بلك منرتاح من الموت والغلا والدولار والراتب القليل ومنرجع نتنفس شوي

-عيني خير لك خيت عيني خير حتظبط وحيقعدوا مع بعض

-إي ومنبعتلن من عنا كيليين بزر لك خليهن خمسة على حسابي وبلا 3 جاجات من عند أسعد، منشحنلن ياهن على جنيف يتسلوا فيهن حلوان الصلحة ان شالله

-لك هدول بدن يشتغلوا ليريحونا، ليطلعونا من هالجورة وإنت بدل ما تدعيلن بدك ياهن يلتهوا بفصفصة البزر

-ما خطرتلي هاي، بجد ما خطرتلي، خلص خليهن عالشاي والقهوة والشغل، ناطرينهن بفارغ الصبر نحن وعمندعيلن الله يسدد خطاهن ورميهن وإصرارهم وضميرهم كمان.

اقرأ أيضاً: الأمم المتحدة تعلن تشكيل اللجنة الدستورية السورية

المقالات المنشورة لا تعبّر بالضرورة عن رأي الموقع