الرئيسيةمعلومات ومنوعات

السكري.. المرض الذي سنصاب به جميعنا وهكذا نؤخر حضوره

باليوم العالمي لمرض السكري.. أهم نصيحة التخلص من العلاقات السامة

السكري هو المرض يلي رح يعاني منو كل الناس دون استثناء بمرحلة معينة من حياتن، لأنو البنكرياس مانو عضو خالد. رح يكبر بالعمر وتبين عليه معالم الشيخوخة، ورح يبطل يفرز أنسولين، وهاد شي ما منقدر نمنعوا، لكن يلي نحنا قادرين عليه، هوي نأخر عملية الشيخوخة هي، وندعم عمل البنكرياس بدل ما نحط عصايتنا بدواليبو.

سناك سوري-استشارات طبية

أهم شي الرياضة، يلي بتحرق السكر وبتساعد بدخولوا جوات الخلية، وبالتالي هيي عم تعاكس الآلية المرضية للسكري نمط2. يلي بتصير فيها خلايا الجسم مقاومة لدخول السكر الخلية، فبيرتفع السكر.

الرياضة كمان بتنزل من الوزن وهاد شي ضروري لدعم عمل البنكرياس والقلب والمفاصل والأوعية، بالمختصر.. كلشي.

إنقاص الوزن مانو وصفة، هوي نمط حياة كامل متكامل، يعني لازم نتعود تكون الألياف حاضرة بوجباتنا على طول، بسبب دورها لإنقاص سكر الدم. وتعزيز صحة الأمعاء، ألياف يعني خضار بكل ألوانها وأنواعها لازم نتعود عليها ونعود أطفالنا عليها ونحببن فيها.

مقالات ذات صلة

شرب المياه كتير ضروري، لعمل كل أجهزة الجسم، ونقص المياه يؤدي لتجفاف وبالتالي ارتفاع السكر، وهاد شي مرهق للبنكرياس.

الحالة النفسية لاعب مهم وأساسي بمرض السكري، بتزيد من الحالة سوء وبتخلي السكر يظهر أبكر، لهيك يُفضل إنو ما نوقف كتير عند العلاقات السامة ونتخلص منها. نحب حالنا ونمارس شعور الامتنان اتجاه الأشياء الموجودة بحياتنا مهما كانت صغيرة وبسيطة. وفي حال سكرت بوشنا الدني مافي مانع نطلب مساعدة من الطبيب النفسي.

وبالختام، لازم نذكر انو مرض السكري هو مرض جهازي يصيب كل أجهزة الجسم تقريباً، لذلك مفروض نعمل متابعة دورية عند أطباء الغدد والعينية والكلية.

يذكر أن اليوم الإثنين 14 تشرين الثاني، يصادف اليوم العالمي للسكري والذي يهدف للتوعية من مخاطره.

أعد المحتوى الدكتور “غدير برهوم” – موقع سناك سوري
اقرا أيضاً: الوسواس القهري.. العلاج الدوائي ليس الوحيد

المقالات المنشورة لا تعبّر بالضرورة عن رأي الموقع

زر الذهاب إلى الأعلى